Fa Cup Semifinal Wembley-ah team pali an inlan dawn
Inrinni zan dar 9:30 hian Wembley stadium-ah Premier League a pahnihna ni mek Arsenal leh Championship club Reading ten FA Cup 2015 semi final hmasa zawk an khel anga, Pathianni zan dar 7:30-ah Premier League club pahnih Aston Villa leh Liverpool ten semi final hnuhnung zawk an khel bawk ang.
Team inang lo
Semi final hmasa zawk a inkhel tur Arsenal leh Reading te hi FA Cup a an sulhnu a inang lo hle. Reading hi kum 1927 hnu lamah FA Cup semi final an luh lehna hmasa ber a ni a, Arsenal erawh champion lai an ni thung.
Team inang
Liverpool hi FA Cup-ah vawi sarih an champion tawh a, an champion hnuhnung ber chu 2006 kha a ni tawh thung, an khingpui tur Aston Villa thung hi chu an champin hnuhnung ber chu 1957 daih tawh khan a ni. Mahse he inelnaah hian sulhnu an nei ṭha hle a, vawi sarih zet an champion tawh a ni.
Champion lai hmaah Reading
A zawna match riat hnehna chang zawn thei Arsenal hmaa din hi Reading tan a chakawm hran lo ang. Reading hi championship table-ah 18 na an ni mek a, relegation zone aṭangin point thum chauhin an him rih. Arsenal erawh Premier League-ah pahnihna ni mekin hmahruaitu Chelsea nen an inthlauhna point sarih chauh a ni tawh avangin champion an sawi ri ngam leh tawh thung.
Arsenal manager Arsene Wenger chuan David Ospina aiah Wojciech Szczesny chu goal ven tir a tum zawk thu a sawi tawh. Wenger tan player duhthlan tur an tam dawn a, midfielder Jack Wilshere chu chhawr theih turin a dam tawh a, ani bakah hian Santi Cazorla, Mesut ozil leh Alexis Sanchez te pawh chhawr theih turin an fit a ni.
Sherwood tan fiahna
Aston Villa manager Tim Sherwood tan Pathianni zan an inkhel tur hi fiahna a ni ang. Villa manager thar hian kar hmasa Inrinni khan khual mualah Tottenham chu 1-0 in an va hneh theih avangin inrintawk na an nei sang ang. Harhtharna chang mek Villa tan Liverpool hmachhawn hi fiahna a ni dawn.
Gerrad-a tan Liverpool
Liverpool-in an captain ropui Steven Gerrard chu tun saeson tawp rual hian an chan tawh dawn a, a tana an tih theih ṭha ber ni a ngaih theih chu tun season a FA Cup nomawi chawi pui a ni ngei ang. Premier League-ah hma hruaitu Chelsea chu point 16 zeta an phak loh tawh avangin champion beisei na an nei tawh lo a, Europe-ah pawh beisei tur an nei tawh lo. An beisei tur neih chhun chu FA Cup hi a ni.