Ruahsur hnuaiah Aizawl FC-in Chanmari an ngam lo
Chanmari FC-in an coach Lalsangzuala Hmar enkawlna hnuaia fiahna hautak an paltlang nghal - I Day Football match hmasa berah MPL final-a kum hnih a zawna an hneh tawh loh Aizawl FC chu 2-1 in an hneh.
Tualchhung football thu-nun tum Chanmari hian Mal-sawmfela leh Lalruatfela Zote hmangin goal an khung a, hun tawp hnaih lamah Aizawl FC-in Lalramchullova goal ropui hmangin si khat sut mah se goal dang an khung belh lo a, Ghanaian striker Bright Medsion Mends dah ṭhatin a awm.
CFC tan Fela
Inkhelh ṭantirh aṭangin team pahnih an inngam tawk a, hun ṭha nei hmasa zawk chu Aizawl FC an ni. Inkhelh ṭan atanga minute 3-na lekah Aizawl FC winger Albert Zohmingmawia'n ṭha taka ball a vir kual pui hnuah Chanmari goal-ah pet mah se goal zawnah a kal lo.
Chanmari FC-in an nawr let a, minute rukna lekah Mal-sawmfela'n a hun ṭha neih chu hnai takin aṭangin a pet over. Ruahsur avangin khelmual a nal a, team pahnih player-te an duh angin an che thei lo. Minute 25-naah freekick hmang ṭangkaiin Chanmari midfielder R. Malsawmtluanga freekick pet chu Lalmuanawma'n a tauh hnuah Sawmfela'n chiang takin a pet goal - training-naa ṭha taka zir tih a hriat!
Aizawl FC tan an striker Van-lal-duatsanga chu a hriam tawk lo a, veteran midfielder Ro-hmingthanga'n a chance neih a hman ṭangkai theih loh avangin I League club goal nawr a na lo. Goal hmaah Chanmari FC an hlauhawm zawk a, AFC defender Lalruatthara'n an lamah a pet lut teuh viau bawk.
Minute 42-naah goal ropui a lut a, Lalruatfela Zote chuan amah vengtu defender Lal-
ṭhakima chu ball nen a tlan pelh hnua a cross chu Ruatthara'n a dang per a, Republic Vengthlang for-ward hian a pet goal chiang hle.
Chanmari-in Aizawl FC an nawr chhunzawm a, Lalram-mawia dinglam kilah a tlan chakna hmangin hun ṭha a insiam a, a ball pet ṭha tak chu Lal-muanzova'n a hmang ṭangkai thei lo. AFC lam tan Albert-a'n Lal-rinchhana laka a freekick hlawh-chhuah chu Chullova'n
ṭha takin pet mah se Chanmari keeper Lalmuanawma tan dan theih loh a ni lo.
Injury time-ah Vanlalṭha-zuala thlakin Bright Medsion Mends an luhtir a, hun a tlem tawh avangin Ghanaian striker hian a theihna a lantir hman lo.
Goal ropui
Chawlhlawk hman zawh a nih hnuah Chanmari-in hun
ṭha an nei hmasa a, Muanzova'n club hlui lama goal thun theihna remchang chu uiawm takin a hlah. Aizawl FC-in chawlh-lawkah thu ṭha an ngaithla tih a chiang a, first half aiin an goal nawr a na zawk.
Penalty area-ah Ghanaian striker tluk vanga an penalty beisei pek an nih loh hnuah Aizawl FC-in freekick an hlawh chhuak, Chullova freekick pet hi Albert-a chuan hnai set sawt aṭangin a tauh goal lo. Rohminga ke aṭanga chhuak Albert-a goal shot per chu tlawh goal theih nia lang ni mah se Aizawl FC foreign striker a che rang tawk lo.
Ghanaian striker hian Ro-hminga ball pek ṭha bik chu goal-ah a lalut muang hret a, local football-a inhmelhriattirna hun ṭha a neih a bawhpelh.
I league-a khel ṭha ṭhin Chullova leh Brandon-a ten an hun ṭha an bawhpelh zel a, hun tawp nan minute thum chiah a awm tawh tihah erawh Armed Veng tlangval a nil reng bik lo. I League khelh zawh taka player langsar ber pawl tih ngam hian yard 40 vela hla a-
ṭangin a pet a, Chanmari keeper Lalmuansanga'n tih theih a nei lo. Aizawl FC tan goal dang khung turin hunin a daih tawh lo a, an elpui club lakah an tlawm.
Kan tho leh dawn - Mala
I League-a an tlak hnua an competitive match hmasa berah Aizawl FC an chak zo lo a, coach K. Malsawmkima a buai phah lo. Mala chuan, "Vawiin chu a chak lo zawk kan ni a, beisei kan phak lo a ni. Tun ai khan khel ṭha thei kan ni a, kan tluk hlen hmain kan insiam-
ṭha vat ang. Match lehah chuan Aizawl FC team ṭha zawk in hmu ang," tiin an insiam ṭhat tur thu Vanglaini palai a hrilh.
Mizo club zinga I League khel hmasa ber ni tura Aizawl FC hruaithlengtu coach chuan an Ghanaian striker chungchang sawi lang nghalin, "Vawi khat chiah kan zingah practice a la nei hman a, a thiamna angin a khel chhuak thei lo a ni. Match lehah chuan ani pawhin tun aia ṭha zawk khan a khel thei tawh ang," tiin an striker thar lakah beiseina sang tak an neih thu a sawi lang bawk.
Sanga lawm a kim lo
Chanmari-in khingpui harsa ber tur nia ngaih Aizawl FC an hneh a, heti chung hian coach Lalsangzuala Hmar erawh a lawm a kim lo!
Bethlehem Vengthlang FC duhlai Chanmari-in an chhuhsak coach chuan, "At-tack-ing game khelh nuam ti mi ka ni a, 2-1 in chak mah ila ka naute goal nawr a la na tawk lo a, ka duhdan takin kan la khel chhuak lo.Ruah sur nasat vang pawh a ni pakhat a, goal kan khung hnuah ka duh aiin kan game a defensive deuh a ni. Match lehah chuan ruah a sur lo a nih chuan kha aia goal nawr na zawk kan hmuhtir theih ka beisei," tiin inkhel entute tana match hmuhnawm chhawpchhuah a duh thu Vanglaini palai hnena a sawi.