Tour de France A vawi thum nan Chris Froome a champion

Cycling inelnaa ngaihhlut ber zinga mi Tour de France vawi 103-na chu Pathianni khan zawh a ni a, Chris Froome chu pakhatna a ni. British rider hian kum 2013 leh 2015 ah khan pakhatna dinhmun a lo luah tawh a, tun ṭumah hian amah hnaih bertu French rider Romain Bardet aiin minute li leh second ngain a thleng hma zawk.

Tour de France hi July 2-24 inkar khan neih a ni a, stage 21 awmin an tlan thui zawng hi 3,529 km a ni. Kuminah hian team 22 aṭangin 198 rider an tel a, pakhatna Team Sky rider Froome hian darkar 89, minute 4 leh second 48 chhungin a tlan thleng.

Kum 31-a upa Chris Froome chuan, "Pakhatna ka nih hmasak ber ang mai kha a ni a, a ropui khawp em avangin a nawm dan pawh a la danglam reng," tiin ngaia neih a harsat thu a sawi.

Rider ropui Lance Armstrong chuan 1999-2005 inkar khan Tour de France-ah hian vawi sarih pakhatna a ni a, amaherawhchu damdawi hman phal loh a hmang tih amah pawhin a phat loh avangin record aṭangin a hming thai reh a ni. Record dinglaiah chuan vawi nga champion rider pali Jacques Anquetil, Bernard Hinault, Eddy Merckz leh Miguel Indurain te awmin Froome hian a hming lan ve theihna hun ṭha a la neia ngaih a ni.

Spanish rider Indurain chuan 1991 aṭanga 1995 khan pakhatna a ni a, hemi hnua kum zawna champion leh thei hmasa ber chu Froome hi a ni. British rider chuan, "Kum nga emaw kum ruk chhung chu Tour de France a la tel hi ka duh a, hlawhtling thei tura inpeih renga awm ka tum ang. Kei chuan a hlutna hi a tlahniamah ka ngai lo a, inelna ropui tak niin jersey eng hak hi cyclist zawng zawng châk a ni a, kan inelnaah chuan hei aia ropui a awm chuang lo. Nakkumah rawn tel leh hi ka duhthusam a ni," tiin inelna a ngaihhlut thu a sawi.

Tour de France-ah chuan pakhatna hian jersey eng an ha ṭhin a, hei hi an ngaihhlu hle. 2015 World Road Race Championships-a pakhatna Peter Sagan chuan green jersey a ha thung a, he jersey hi point hmu sang ber tana siam a ni thung. Slovak rider hi stage thumah pakhatna a ni a, stage pangaah a sang panga zingah telin kumin a zawna kum nga chhung green jersey a hakna a ni.

Sagan-a teammate Rafal Maj-ka chuan a vawi hnih nan polka dot jersey (jersey var a sena ṭial) a dawng bawk a, he jersey hi tlang inelna bika tiṭha ber hnehna hlan a ni. Rider naupang ṭha ber hnena hlan ṭhin jersey var chu Adam Yates-a'n a dawng thung.

Rider Dinhmun

Rank Rider Team Time

1 Chris Froome (GBR) Team Sky 89h 04' 48"

2 Romain Bardet (FRA) AG2R La Mondiale + 4' 05"

3 Nairo Quintana (COL) Movistar Team + 4' 21"

4 Adam Yates (GBR) Orica–BikeExchange + 4' 42"

5 Richie Porte (AUS) BMC Racing Team + 5' 17"

6 Alejandro Valverde (ESP) Movistar Team + 6' 16"

7 Joaquim Rodríguez (ESP) Team Katusha + 6' 58"

8 Louis Meintjes (RSA) Lampre–Merida + 6' 58"

9 Daniel Martin (IRL) Etixx–Quick-Step + 7' 04"

10 Roman Kreuziger (CZE) Tinkoff + 7' 11"