BVT aiin Dinthar FC an lian hret
Nimin I Day football Lammuala inkhel hnuhnung zawkah season hmasaa beisei phak lo Dinthar FC-in in-dinthar leh an tumzia khelmual chhungah an lantir a, MPL semifinalist Bethlehem Vengthlang FC lakah R. Lalnunmawia goal hmangin 1-0 in hnehna an chang.
Bethlehem Vengthlang lamin an siphurh hi sut tumin bei viau mah se a tawp thlengin Dinthar tlarhnung an ṭangkhawng a, BVT an vanduai piah lamah Lalchhuanawma hnuaia Dinthar defending ṭha lutuk chu fak loh theih a ni lo.
Inkhel boruak a sang tih nemnghet nan BVT midfielder Lalrintluanga (Tuka) leh Dinthar forward Lalruatpuia te chu 'inkhelh banah' hnawhchhuah an ni.
Dinthar an langsar
Inkhelh ṭantirh aṭangin Dinthar an langsar nghal a, forward Ruatpuia leh Michael Lalremruata te chu Bethlehem Vengthlang tlarhnung tan an hnawksak nghal hle.
Minute 20-naah Michael-a bawk a langsar leh a, mah se Aizawl FC striker hlui hian Lalruatpuia ball cross ṭha tak chu khungna hun ṭha nei mah se Bethlehem keeper Malsawmdawngzela'n awlsam taka goal chhuah a tum lo.
DSK Shivajians Academy aṭang-a Dinthar zawmtu Lalruatpuia a hmuhnawm a, minute 32-naah ṭha taka ball a tlanluhpui erawh goal post bak a tih per thei lo. Mizoram Police FC forward hlui Rutapuia vek hian minute sarih hnuah BVT goal zawnah a pet a, BVT keeper Mala'n lo dang per mah se a per lehlam hi R. Lalnunmawia'n goal-ah a khung chiang hle.
BVT an ṭang
Second half-ah BVT-in an si phurh sut ngei tumin nawr mah se Dinthar tlarhnung an paltlang thei lo a, a pawimawh ber goal an khung thei lo.
Goal khata hmahruaitu Dinthar an chiai duh lo a, counter attacking hmangin hun ṭha an nei ve zauh zauh bawk. Hun tawp thlengin goal dang a lut tawh lo a, a tawpa chungnung zawk chu Dinthar FC an ni.
Eng nge an sawi?
Bethlehem Vengthlang coach Lalbiaksanga Colney chuan, "Midfield-ah rorel tumin 4-5-1 formation ka hmang a, mah se ka besei angin kan khel chhuak leh thei si lo a, keima thiam loh a ni. Shillong Lajong kan hmachhawn hunah chuan tun aia ṭha zawka khelh kan tum ang a, inkhel hmuhnawm zawk kan lantir theih ka beisei," tiin hmasawn an tum tih Vanglaini palai a hrilh.
Dinthar coach Lalchhuanawma chuan, "Ka naute khelh danah ka lawm a, kan duh ang tak result kan hlawh chhuak a ni. Mahse, goal khat aia tam zawk khung thei kan ni a, inzir zel kan la mamawh. Kan defending ṭhat hi kan innghahna a ni a, counter attacking hmanga nawr let hi ka duhdan a ni. Chutiang ang tak chuan ka nauten an khel chhuak a, ka lawm khawp mai," tiin an khelh danah a lawm thu a sawi.