FC Goa-ah neitu thar

Delta Corp chairman Jaydev Mody chuan Indian Super League club FC Goa-ah neitu nihna 65% share chu Dattaraj Salgaocar leh Shrinivas Dempo hnen aṭanga a lei thu a puang a, Goan club-ah hian share ngah ber a ni tawh dawn tihna a ni.

Casino company Delta Corp bakah hian Indian cricketer lar Virat Kohli chuan FC Goa-ah hian neitu nihna 10% a nei ve bawk a, Videocon chuan 20% an nei mek bawk.

Mody chuan, "Kan tan chuan tun hi hun duhawm leh danglam bik a ni. India ramah infiamnain nasa takin hma a sawn a, a bik takin football hmasawnna hi a chak em em a ni," tiin FC Goa-a neitu dinhmun luah tura sum tam tak a sen chhan a sawi.

Hetihrual hian ISL Appeals Panel chuan season hmasa final khelh zawha lawmman dawng duh loa chhuak tau FC Goa hi hremna an tihnep sak bawk. FC Goa hian point 15 paih saa khel tura tih chu ngaihdam an ni a, vaibelchhe 10 chawi tura tih an nihna chu vaibelchhe rukah tih hniamsak an ni bawk.