Ni li chhunga vawi hnih chak lo Chelsea

Premier League table chung ber boruak an tem hman zauh a, an boruak pawh a lian hman. Mahse, tun hnai ni li chhungin Chelsea chu vawi hnih an tlawm ta. Manager Frank Lampard chuan ṭha taka khel lo tan chuan hlawhtlinna chan theih a nih loh thu a sawi.

Thawhlehni zan inkhelah Blues lamin Olivier Giroud-a goal hmangin hma hruai mah se, mualneitu Wolverhampton Wanderers lamin Daniel Podence hmanga an sut bakah Pedro Neto chuan hun tawp hma chiahin chakna goal a khung. Nuno Espirito Santo nauten 2-1 in hnehna an chang.

Molineux Stadium a inkhelah Lampard-a'n striker Giroud chu inkhel bul a ṭantir a, manager beisei ang ngeiin chhanna a pe. France international hian Ben Chilwell-a'n kawng chen vela a ball cross chu laklawh nei miah loin a pet goal.

Giroud ball pet hi keeper Rui Patricio chuan a lo dang a, goalline a pelh hmain dang hmanah inngai mah se line a pel hman - minute 49-naah mikhual lamin hma an hruai. Everton ngam lo hlim Blues tan chak turin mahni goal venhim a tawk.

Chelsea lamin goal an khung belh thei lo a, minute 66-naah Podence-a'n si phurh a sut. Portugal forward hian box chhungah inringtawk takin ball a chang a, defender Reece James leh Chilwell te ven karah Edouard Mendy dan theih lohin a khung.

Neto laka James chet danah Wolves lamin penalty an beisei a, mahse referee Stuart Attwell-a'n a pe lo - VAR a rawn hnuah pawh a thutlukna pangngai a kaltlangpui. Penalty pek a nih loh hnuah Neto hian counter attack aṭanga goal ṭha tak khungin a team a chakpui.

Toffees an hneh loh ṭum leh an mual Stamford Bridge a Tottenham nen an inhnehtawk ṭumin Lampard-a'n goal an khung thei lo chu buaina a nih thu a sawi a, an buaina hi chinfel a la ni chuang lo niin a lang.

A tir lam minute 45 chhungin target zawna pet an nei lo, defender Kurt Zouma-a'n sang taka zuang chungin goal bar a tauh per a, a vanneih ni a ni lo. Corner aṭanga ball kal chu Giroud chuan a tauh over bawk.

Man to taka lei Kai Havertz leh Timo Werner ten beisei an la phak lo chhunzawm. Kum 34 mi Giroud chu khel phak tawh lo tura ngaih ni mah se an zingah chuan goal khung thei ber a la ni, inelna hrang hrangah goal sarih a khung tawh.

Chelsea manager Lampard chuan, "Minute 60 chhung chu team ṭha zawk kan ni, kan dinhmun sawhngheh theihna hun kan neih laia kan puitlin thei lo kha a pawi. Kan khingpuite kha counter attack thiam bik an ni a, ka player thar ṭhenkhat ten an la hre tawk lo," a ti.

Nuno Espirito Santo-a'n a duh dan takin a naute inkhel hmuhnawm a chhawp chhuahtir ṭhin, kuminah erawh beisei an phak lo. Mahse a zawna match hnih chhung goal an khung loh hnuah goal an nei leh ta.

Striker chhuanvawr Raul Jimenez la chhawr thei lo mah se kum 18 mi Fabio Silva a hmuhnawm a, tlarhma lama Neto puitu pawimawh a ni. Podence leh Ruben Neves ten an theihna tak an lantir leh tawh bawk.

Wolves manager Santo chuan, "Inkhel chawhma lamah chuan Chelsea lamin ball chang tamin hun ṭha pawh an nei zawk, a hnu lamah erawh kan tum leh duh dana khelin ṭha takin kan bei let thei tawh.

"Aston Villa lakah hun pek belha penalty kan chawi avangin kan tlawm, tun ṭumah erawh hun tawp hamrik rik dawna goal kan khung avangin point thum kan hmu ve thung. Football hi chu a tawp thlenga ṭan peih a ngai," a ti.