I Day Football 2016 Chhinga Veng inlan hun a thleng ta

Mizoram Premier League kai thar Chhinga Veng FC-in player an lakluh ṭhat avangin thawm an nei lian a, vawiin chhun dar 12:00 hian Chanmari West FC nen lammualah an inkhel ang.

MFA Cup leh Aizawl DFA First Division champion 'Chhingcows' khingpui tur 'West Warriors' hi MPL an khelh hnua an squad chhah ber ṭum a ni ve bawk.

Inhliam vanga buai

Chhinga Veng FC chuan defender pawimawh Ronald Zothanzama, K. Lalthlahlova (Patea) leh Lalramfelpuia te inhliam vangin an chhawr thei dawn lo a, ani bakah hian Aizawl FC aṭanga an lak winger ṭha H. Lalmuankima a dam chiang lo bawk.

Coach Lalremtluanga chuan, "Mi tam takin team ṭha tiha min sawina chhan player-te kan chhawr thei dawn lo a, Pathianin min dahna hmun hi lawm taka kan pawm thiam a
ṭul. Pathian rinchhanin kan khel dawn a, team angin kan khel ang," a ti.

Chhinga Veng tlarhnung hi captain Joseph Lalnunpuia'n a ho dawn a, Salem Veng tlangval bakah hian Lalrozama, Laldinliana leh Vanlalthlanga te chhawr theih turin an awm.

Goalkeeper hi nikum Santosh Trophy khel tura koh R. Lalhmangaihzuala a ni a, Lengpui keeper hian tualchhung football-ah tu nge a nih tih an rawn pho chhuak ang. Midfield-ah Khasi tlangval Joy Mrona Khar Raswai an kawl a, Shillong Lajong player hlui hi khel phak tak maw?

Tlar hmaah striker ṭha bik MS Dawngliana an nei a, a kawppui Khawzawl striker PC Vanlalhmangaihzuala erawh a ṭhat dan chiah hriat a la ni lo. PC-a bakah hian first division-a che ṭha Vanlallawma leh Lalthlamuana-te inelna sangah fiahin an awm dawn.

Player nei ṭha CVFC hi fans pawh nei ṭha tel tura beisei an ni.

Hei le, West Warrior

Chanmari West FC-in coach tawnhriat nei ṭha HC Zarzoliana an lalut a, Dinthar FC leh Chanmari FC lo enkawl tawhtu Zara hian player ṭha a hruai lut.

Kum dang zawng aiin West Warrior hi an ṭha zawk a, wing-a MPL1 best player R. Laldanmawia leh Laldampuia awm tur pawh hi huphurhawm tham an ni. Winger ṭha pahnih hian striker chak H. Lallianzama an thlawp dawn a, Zobawk tlangval hi Armed Veng captain Lalbiakhlua'n a pui dawn bawk.

West Warrior hian tlar-hnungah R. Lalawmpuia (Mapuia) leh Toky Zomuanpuia te an inkawptir a rinawm a, TATA Football Academy chhuak Toky hi Aizawl FC-ah khelhna hmun a chan tam loh avangin a football career tinung ṭha leh turin tun ṭuma a hun ṭha a bawhpelh a thiang lo.

Defence thlawp tur hian Zo United aṭanga an lak K. Lalnunzama a awm a, midfielder thawkrim leh huaisen Lalmuansanga an nei bawk.

Nikum I Day Football-ah khan Chanmari West hian semifinal thleng mah se Bethlehem Vengthlang laka 6-0 ngawta an chak loh avangin coach Chawngthansanga'n a hna a chan phah a, hei vang hian coach thar Zara pawhin inelna hi a lak thutak lehzual a ṭul dawn a ni.

Chanmari West coach Zara chuan, "Kan tan chuan kan inkhel hi a pawi-mawh ber a, midang result a pawimawh lo. Chhinga Veng laka point hlawhchhuah hi kan tihtur a ni a, kan tum a ni bawk. Tunah chuan Chhinga Veng nena kan inkhel tur chiah hi kan ngaihtuah a, chumi zawh chuan kan hmachhawn leh tur AIFF Academy lam kan hawi ang," tiin a tla chawp zela an khingpui tur an ngaihtuah tur thu Vanglaini palai a hrilh.

Group of Death

Group A-ah hian Chhinga Veng leh Chanmari West bakah champion lai Aizawl FC, Chanmari FC leh AIFF Academy te awmin Group of Death-ah ngaih a ni. Nimin lamah AFC-in Chanmari FC an ngam lo a, hei hian group A ngaihnawmna a belhchhah ang.