Manchester derby hmasa ber an ṭhulh

Nimin tlaia Manchester United leh Manchester City ten China khawpui Beijing-a friendly match an khelh tur chu ruahsur nasat vanga ṭhulh a ni.

Pathianni khan United manager Jose Mourinho chuan Birds Nest stadium-a pitch chu a ṭhat loh thu a sawi a, City manager Pep Guardiola pawhin an ṭhulh hmain player-te inhliam loa an chhuah chu a duh ber a nih thu a sawi bawk.

City leh United chuan tournament organiser nena an ngaihtuah ho hnua ṭhulh tura thutlukna an siam thu an puang. Pathianni zan khan club pahnih hi an khelhna tur Birds Nest-ah an practice thei lo a, zan lamah ruah nasa takin a sur a, nimin lama nasa lehzuala sura tura ngaih a nih avanga ṭhulh a ni.

Tour fuh lo

Manchester United player phurtu thlawhna pakhat zawk chu khawchhiat vangin Beijing aṭanga 160 km-a hla Tianjin-ah ṭumtir a ni.

Portuguese manager Mourinho-a'n thuthar thehdarhtute a hmachhawn
ṭum pawhin pungkhawm an tam lutuk avangin hun an hmanna hmun chu sawn a ngai hial.

United hian China tour-ah hian Borussia Dortmund chu 4-1 in an hneh lo a, City nena an khelh tur an ṭhulh bawk avangin ruahhman dan chuan nimin lam khan Manchester lamah an let ang.

City erawh vawiin hian Shenzhen an pan ang a, Ningani hian Dortmund an hmachhawn ang.