Zo United hmaah Ramhlun North fiahna

I Day Football-ah MPL5 Qualifier champion Ramhlun North FC an inlan dawn a, Lalruatliana Sailo hote hian tlai dar 2:45 hian Lammualah Zo United an hmachhawn ang.

Hmel thar Ramhlun North

Ramhlun North-in inhliam keeper Liansangpuia leh forward Ricky Lalremsiama-te an chhawr thei dawn lo a; Siaha DFA lamin an forward MC Malsawmzuala match thum chhung an hremna MFA-in an kaltlang pui bawk avangin coach Tawia'n tawnhriat nei ṭha B. Malsawmzuala leh Kolasib rawlthar Vanrammawia Ngente te chiah striker a kawl.

Amaherawhchu Chanma-ri FC aṭanga an lak Vanlal-thlamuana leh Zembawk winger ball thiam David Lalrinchhana te'n field sir lam aṭanga tlar hma an thlawp theih dawn avangin an goal nawr hi chu a na tawk tho tura ngaih a ni.

En châkawm tawh erawh Lal-chhuanpuia a ni a, dam dapa ball pe kual ṭhin Vaphai midfielder hi tualchhung inelna sangah fiahin a awm dawn. Tlarhnung lam hi Chanmari West defender hlui C. Ramdinmawia'n a ho dawn a, player tam zawkin an tawnhriat neih tlemna theihngilhin an thiamna an phochhuah a ṭul dawn.

Hei leh Zo United!

Ramhlun North khingpui tur Zo United pawhin player pathum ngawt inhliam vangin an chhawr thei lo a, chung zingah chuan Royal Wahingdoh aṭanga an lak Laldinmawia a tel. Electric Veng midfielder Dinmawia aiawh turin Dominic Lalruatfela chu defensive midfielder a ni a, Kolasib-a hming chher tawh Dominic hian inlena sang zawkah hming chher a tum dawn.

Reitlang FC tiha koh ṭhin Zo United hian Mizoram league sang ber an khelhna a rei tawh avangin tawnhriat player an kawl nual a, Royal Wahingdoh aṭanga an lakluh H. Malsawmtluanga theihna hriat a châkawm, Tlangnuam midfielder Mala hi tun hma deuh chuan Mizo player khel hmuhnawm zinga sawi tel ṭhin a ni.

Eng nge an sawi?

Ramhlun North coach Lalruatliana Sailo chuan, "I Day Football-ah hian result ṭha tak neih kan tum a, chutihrualin kan
ṭhat dan ber hriatna atan hman kan tum. Zo United hi MPL semifinal thleng thei an nih avangin an chhe dawn lo a, kan team pawh kan inkhai rual e," tiin MPL kai thar ni mah se an zam loh thu a sawi.

Zo United coach Vanlalrova chuan, "Coach ṭha tak an nei a, mah se kei ni hi team ṭha zawkah kan inngai a, kan chak pawh ka ring. Inliam vangin kan khelh dan kan tihdanglam deuh a
ṭul a, match hmasa ber a nih dawn bawk avangin rilru zawng zawnga kan khelh a ṭul dawn a ni," tiin a sawi.