Antetokounmpo contract thar a turu!

Milwaukee Bucks star Giannis Antetokounmpo chuan kum nga daih contract a ziak thar a, basketball inelna sang ber NBA huang chhunga player leh club inremna sang ber niin US dollar maktaduai 228.2 hu zeta hlu a ni hem mai.

Kum 26 mi Anteto-kounmpo-a contract thar hi kum nga chhung tih ni mah se, a duh a nih chuan kum li hnuah club dang a zawm thei ang tih a inziak tel. Most Valuable Player (MVP) vawi hnih ni tawh chelh hi Bucks tan thu lawmawm a tling ang.

Houston Rockets guard James Harden chuan 2017 khan US dollar maktaduai 228 hu a hlu contract a lo ziak tawh a, he contract hlu tak hi Antetokounmpo chuan a rawn khum ta chiah. Thla khata a hlawh tur hi India pawisa chuan Rs 27,95,38,640 zet a tling a ni.

Greek tlangval Anteto-kounmpo chuan, "Milwaukee Bucks nen kum nga chhung atan inremna kan nei thei hi ka lawm, hei hi ka in leh chenna khawpui chu a ni. Hlawhtlinna chan beiseiin hun bi i chhiar leh ṭan ang u," tiin twitter lamah a tarlang.

Antetokounmpo awmna Bucks hian regular season liam ta kha Eastern Conference-ah a chung bera awm chungin hun tawp an hmang, vawi 56 zet chakin season an hman ṭhat ber ṭum an tawng hial a ni.

An thiampuipa Anteto-kounmpo hi a zawna a vawi hnih nan MVP atan thlan a ni a, chawimawina dang Defensive Player of the Year pawh hlan a ni. Tun hmain Michael Jordan leh Hakeem Olajuwon te chauhin hetiang chawimawina pahnih hi an la dawng rual thei.

NBA regular season lamah che rapthlak viau mah se playoff-ah erawh an tum ram an thleng lo. Playoff semifinal-ah Miami Heat an ngam lo, season tharah chuan NBA nomawi an beisei ang.