I Day Football 2016 Zo United leh Ramhlun North an inhnehtawk

Nimin I Day Football inkhel hnu-hnung zawkah team intiat tawk Zo United leh Ramhlun North an inhma-chhawn a, goal lut loin an ṭin.

Lammuala inkhelah Ramhlun North striker Vanrammawia Ngente chuan a hun ṭha neih a chhawr ṭangkai thei lo a, Zo United tan Vanlalreamsanga goal khung chu a offside vangin pawm a ni lo thung.

A goal lo

MP5 qualifier champion Ramhlun North lamin a tikimtu satliah nih an tum lo tih lantirin inkhel ṭan phat aṭang-in goal khung an tum ngam. Chanmari FC aṭanga an lakluh Vanlalthlamuana'n goal zawnah a pet lo a, Kolasib forward Vra pet chu Zo United keeper MC Lalneihsanga an dan sak bawk.

Zo United an awm mai mai bik lo, first half tawp dawnah Vanlalremsanga chuan chiang zetin a tauh lut a, mah se he goal hi offside vangin pawm a ni lo. Ramhlun North lam tan Royal Wahing-doh junior aṭanga an lakluh Jerry F. Zonunsanga pet chu keeper MC-a'n a dang a, Zo United defender Malsawma Chhangte-in penalty box pawn aṭangin kawh zetin pet mah se goal ban hrulah a kal liam a, first half a tawp.

First half-ah Ramhlun North lamin goal an nawr na zawk a, second half-ah erawh tawn-hriat nei zawk Zo United an chungnung. MPL4 season tawp lama langsar Isak Vanlalpeka goal khung theihna chance ṭha ṭum hnih a hlah a, Luangmual FC aṭanga coach Vanlalrova hnung zuitu Zonuam tlangval Lalṭhazuala'n (Puitea) Ramhlun North defender pahnih inkarah harsa takin hmunruak ṭha tak insiam chawp thei mah se a finishing a ṭha tawk lo.

Inkhel thlirin team pahnih an intiat tawk a, an vanneih ni chu ni se goal hnih emaw goal thum emaw khung thei dinhmunah an ding ve ve. Zo United lamin hun tawp dawna defender Lalnunpuia Pachuau tauh over an ui anga, Khawihai tlangval Vanlalremsanga goal khung an pawm loh an sawi zui bawk ang.

Eng nge an sawi?

Ramhlun North coach Lal-ruatliana Sailo chuan, "Game awmze nei loin kan khel rei a, kan insiamṭhat hnuah erawh hlauhthawn awmin kan awm lo. Second half-ah min nawr na em em a, mah se kan ṭang tluan thei. Thla khat chhung vel inbuatsaihna kan neih chhungin hmasawnna nei mah ila duhthusam kan la ni lo a, beisei erawh kan nei sang viau," tiin a sawi.

Zo United coach Vanlalrova chuan, "Kan zir angin kan khel thei a, point thum hmu thei tur pawhin kan khel chuan ka hria. Ka naute khelh dan-ah ka lawm a, hun ṭha kan insiam tam tak kan chhawr ṭangkai thei lo erawh a pawi. Dinthar kan khelh hunah chuan tun aia ṭha zawka kan khelh tawh ka beisei," tiin Vanglaini palai a hrilh.