Inzir turin kan lo kal - AIFF U-19 boss Pinto
AIFF Academy chuan nimin chawhma lam khan Lammualah training an nei a, I Day Football tikimtu ni ringawt loin inkhel hmuhnawmna belhchhahtu an ni dawn tih chiang takin a hmuh theih.
Head coach Floyd Pinto chuan, "Mizoramah hian inzir turin kan lokal a, chak kan tum nachungin kan chak lo a nih pawhin inzirna tho a ni," tiin Vanglaini palai a hrilh.
Zirtawpni tlai dar 2:45 hian AIFF Under 19 team-in Aizawl FC an hma-chhawn dawn a, tualchhung club chhuanvawr leh India ram nau-pang ṭha rual an inkhel dawn.
Captain Edmund
Lunglei Bazar Veng rawl-thar Edmund Lalrindika chu team captain a ni a, ani bakah hian Mizo paruk an awm.
Coach Pinto chuan, "Mizo eng zat nge lut dawn tih ka sawi thei lo a, starting eleven tur hi tihfel a la ni lo. Edu (Edmund) pawh a inhliam hnua a training hmasa ber ni mah se field chhungah harsatna a nei lo," a ti.
AIFF Under 19 hian 4-5-1 formation an hmang tlangpui a, dam ṭha chu ni se captain Edmund chu hmatawnga awm tur a ni. Lunglei rawlthar hian ball a thiam a, goal khung bakah ṭhiante goal khung tur siam thiam niin Subroto Cup 2015 leh I League U18 a AIFF Elite Academy champion-na kawngah player pawimawh a ni.
Mizo dang
Champhai Venglai right back Zonunmawia hi a chet ran avangin a hmuhnawm a, goal nawr kawngah pawh player ṭangkai niin Edmund nen hian batch khat an ni - MFA Under 14 team aṭanga AIFF-in an thlan, hun rei tak India sub junior leh junuor team-a awm tawh an ni.
2015 Subroto Cup-ah Mizoram tan Lalengzama Vangchhia a inlan a, I League U18-ah chuan AIFF Academy tan khelin semifinal leh final-ah goal a khung. Engzama hi midfield ti khawngtu a ni.
Lunglei Serkawn midfielder B. Lalnuntluanga hi season liam ta khan Chhinga Veng FC tan a inlan a; 2015 Subroto Cup-a Mizoram captain a ni.
Lunglei Venghlun forward B. Rohmingthanga'n Mohun Bagan aṭangin AIFF Academy a zawm a, khup hliam inenkawl mek a ni.
Lunglei Venghlun defender Lalliansanga'n trial paltlangin academy a zawm a, ani bakah hian Durtlang wing back Joseph Lalsanglura ten starting eleven an chan phak a la rinawm lo deuh.
Inzir tur
AIFF Academy-a player pawi-mawh ni ṭhin Jerry Lalrin-zuala, Anirudh Thapa, Prosenjit Chakraborty, Baoringdao Bodo leh Bedashwar Singh te chu France-a FC Metz Academy-ah an inzir chhunzawm avangin Mizoramah an inkhel dawn lo. Chutihrualin AIFF Academy-ah hian lut leh chhuak an awm reng a, Lammuala kan hmuh tur hi batch thar an ni.
AFC Under 19 head coach Floyd Pinto chuan, "Kan tan chuan I Day Football hi inzirna ṭha tak a ni dawn a, Mizoram Premier League club te bul
aṭangin thil tam tak zir kan tum dawn. Nakkum hian AFC Under 19 qualifier kan hmachhawn dawn a, chumi atan chuan hmun hrang hranga inkhelh hi kan mamawh. Goa khaw lum hnuaiah kan inzir a, tunah Aizawl boruak nuam tak hnuai-ah kan inkhel leh dawn. Hei bakah hian ground hrang hranga khelh te hi kan tan chuan inpuahchahna ṭha a ni a, result ṭha tak neih kan tum ang," tiin Vanglaini palai a hrilh.
Tun ṭumah hian junior team aṭanga Under 18 team-a sawn chhoh forward Yadav Rahul leh midfielder Namgyal Bhutia chevel a hmuhnawm a, vice captain Abhishek Haldar chu Manchester United lak tum Paul Pogba nen khaikhin tlak ni lo mah se an hmel hmang leh an chet dan chu inang tak an ni!
Practice match-ah Aizawl DFA hnuaia third division club pakhat an hmachhawn a, a khat mawi tawka goal an khung reng avangin Lammuala inlan tur AIFF Academy khelh hun a nghahlelh awm tawh hle.
Aizawla AFC B Licence coaching certificate zir chhuak Pinto chuan, "MPL club hmaah eng ang chiaha ṭha nge kan nih tih kan hre lo a, mah se kan ṭhat dan ber chu lantir kan tum a ni. Inzir tur kan ni a, kan tan chuan kan hmaa chona hmachhawn hi a châkawm tawh hle. Tun hi Aizawl ka vawi hnih rawn kalna a ni a, Chhinga Veng coach RT-a leh Chanmari FC coach Sanga te hi ka hmelhriat tawh a, helai hmuna ka tlangnel tawh avangin ka player-te hnenah pawh inrintawkna ka tuh thei ang," tiin Vanglaini palai a hrilh.
AIFF Academy Squad
S.No Name J No. State Position
1 Deepak Bulani 31 Gujarat Goalkeeper
2 Mohammed Jafar Mondal 1 West Bengal Goalkeeper
3 Mohammed Haroon 32 Uttar Pradesh Goalkeeper
4 Zonunmawia 12 Champhai Venglai Right Back
5 Joseph Lalsanglura 6 Durtlang, Aizawl Right Back
6 Amal Das 28 Kerala Centre Back
7 Jayananda Singh 13 Manipur Centre Back
8 Lalliansanga 27 Lunglei Venghlun Centre Back
9 Sumit Rathi 2 Uttar Pradesh Centre Back
10 Kishan Singh 21 Manipur Left Back
11 Rajav Gupta 9 Jammu & Kashmir Right Winger
12 Pratap Kumar Tamang 11 Sikkim Right Winger
13 Lalengzama Vangchhia 8 Lunglei Electric Veng Central Midfielder
14 Abhishek Haldar 15 West Bengal Central Midfielder
15 Namgyal Bhutia 23 Sikkim Central Midfielder
16 B. Lalnuntluanga 17 Lunglei Serkawn Midfielder/Winger
17 Naorem Roshan Singh 16 Manipur Left Winger
18 Edmund Lalrindika 7 Lunglei Bazar Veng Forward
19 B. Rohmingthanga 22 Lunglei Venghlun Forward
20 Yadav Rahul 10 Karnataka Forward
21 Rahim Ali 18 West Bengal Forward
Officials
1 Floyd Pinto Mumbai Head Coach
2 Felix Dsouza Goa GK Coach
3 Sumedh Desai Mumbai Physio
4 Deepak Negi Delhi Manager