India-a academy nei tur Aston Villa

Premier League aṭanga Championship lama tla hlim Aston Villa chuan England ram pawn lama an club academy hmasa ber ni turin New Delhi-ah football zirna academy an hawng dawn.

Birmingham khaw club As-ton Villa neitu thar Dr. Tony Xia chuan Thawhṭanni khan Delhi khawpuiah press conference neiin academy hawn an tum thu hi a puang a, he hunah hian Villa official ṭhenkhat bakah India a cham chhunga inkawmna a neihpui central sorkar-a Human Resource minister Prakash Javadekar leh Youth Affairs and Sports minister Vijay Goel-te chuan an telpui.

Hetiang a nih rual hian Aston Villa hi India ram state hrang hrang school ṭhenkhat sport course football bika advisor turin ruat an ni nghal bawk a, sorkar school-a football coach-te chu training an pe dawn a ni.

Aston Villa chuan India rama academy hawn an tum chhan chu international level talent nei Indian player zinga zawnchhuah a nih thu an sawi. Academy hmun tur hi Delhi Municipal Council chuan a ngaihtuahsak ang a, English football-a an kalpui dan angin kum nga chin chunglam nau-pangte chu zirtirna an pe ang.

Pound maktaduai 76-a Villa leitu Dr. Tony Xia hian Manchester City-in an club huang an zauh anga hmalak a duh ve niin an sawi. Arab sum hmanga chawm Manchester City hian New York, Melbourne leh Yokohama-ah te club an nei a, Dr. Tony hian hetiang chiah hian India ramah club neih ve a duh a ni.

Recon Group hotupa chuan a hmathlir hi zep duh loin, "English football-a club hlawhtling ber pawl Aston Villa chuan khawvel huapa inzarpharh zel a duh a, Indian Super League-ah pawh club neih ve a duh a ni. Chumai niloin India ram hmun hrang hranga academy hawn hi kan duh dan chu a ni," a ti.

Chinese sumdawng hausa chuan kum 2017-a India-in U17 FIFA World Cup a thlen tur pawh a theih anga tihlar sak a tum thu sawiin, "Aston Villa hian khawvela football academy ṭha ber pawl hmun hrang hrangah kan nei a, kan club ṭantu fans ruhkawl zingah hming langsar tak tak David Cameron, Prince William leh Tom Hanks te an awm bawk. Heng kan inpawhna kaltlang hian U17 FIFA World Cup lo thleng tur hi theihtawpa phochhuah kan tum ang a, India ramah football hmanga ruai ropui tak ṭheh kan tum a ni," a ti.

Kum 1874-a din Aston Villa hian season tharah a vawi khat nan Championship khel dawn mah se English club hlawhtling ber zinga mi an lo nih tawhna erawh thai bo theih a ni lo. Premier League ṭan a nih hma khan league nomawi vawi sarih an lo chawi tawh a, FA Cup pasarih leh League Cup panga an lo chawi tawh bawk.

European Cup (tun hnua Champions League ni ta)-ah kum 1982 khan final-ah Bayern Munich hnehin an lo champion tawh a, an nomawi hunnaah European Super Cup in hung hmuh tur a awm bawk.