Stoke tana khel tur Egyptian winger

Mark Hughes-a enkawl Stoke City chuan Al Ahly aṭangin Egyptian winger Ramadan Sobhi an lalut a, a chet ṭhat dan a zirin a man hi pound maktaduai 5 thleng sang chho thei tura ruahman a ni.

Kum 19-a upa winger hian kum 16 leka upa a nih laiin Al Ahly tan a match hmasa ber a khel a, season thum chhunga vawi 71 inlana goal 17 khung sakin league nomawi pahnih a chawipui.

Stoke chief executive Tony Scholes chuan, "Player naupang leh talent nei ṭha tak, Premier League-a a theihna pholan chak em em a ni," tiin Egypt tana vawi ruk inlan tawh an player thar chungchang a sawi.