Kum khat chhung DFB president hlui an hrem
Football khawvela thuneitu sang ber FIFA ethics committee chuan German Football Asso-ciation president Wolfgang Niers-bach chu 2006 World Cup thlen dan chungchanga an chhuichian hnuah kum khat chhung football kaihhnawih hrim hrima inhnamhnawih thei lo turin an hrem.
Kum 2006 World Cup thleng tur thlanna hi July 2000 khan neih a ni a, Germany chu a vannei zawkah ṭangin South Africa chu vote hmangin 12-11 in an hneh. Germany-in World Cup an lo thlen tawh dan chungchangah hian FIFA chuan thamna sum inrawlh a awm ni ngeiin an hria a, Wolfgang hi rinhlelh zingah a tel.
Mahse, FIFA chuan 2006 World Cup organising com-mittee-a vice president (media and marketing) dinhmun chelhtu Wolfgang hian World Cup thleng tura an thil tih dik loh ṭhenkhat report tura hrilh a nihna chu ngai pawimawh loin hma a la duh lo a, kum khat hrem a nih phah ta a ni.
Wolfgang Niersbach chuan hrem a nihna hi a khinlet dawn leh dawn loh a la chiang lo a, a ukil-te nen an inrawn hnuah thutlukna a siam ang.
Thamna sum
Germany hi 2006 World Cup thleng tur khan vote lei nan pound maktaduai 4.9 vel FIFA hnenah peah puh an ni a, November 2015 khan Frankfurt police-te chuan 2006 World Cup chhiah awl ruk chungchangah German Football Association (DFB) headquarters chu an lo dap tawh bawk.
November 2015-ah vek hian Wolfgang Niersbach chuan German football hotupa a nihna aṭangin banna a thehlut tawh a, a ban chhanah hian German football buaina chu a mawhphurhna a nih avang leh a hunlaia an pawisa sen chu a ṭha lo zawnga hman a ni ang tih an hriat loh vang a nih thu a sawi.
Niersbach rilru a na
Kum 65-a upa Niersbach chuan, "He thutlukna hian min ṭhawng takzet a ni. Kar hmasa Ningani kha chuan ethics commission hian hremna pek ka nih loh tur thu leh in report tura tih huna ka in report lohna chauh an chhui tur thu an sawi a, heti zawng hian thutlukna an siam leh si a ni," tiin a lungawi lo hle.
Hetihrual hian FIFA panel chuan Niersbach an hremna leh chhuina ber chu eiruk leh thamna sum chungchangah a nih loh thu an sawi a, heng thil a thlen dan chungchanga Niersbach-a hmalak dan leh FIFA a thawhpui ṭhat lohna chu an chhui ber a nih zawk thu an puang.