I Day Football 2016 Chhinga Veng leh Chanmari W an intiat

27th July, 2016

Mizoram Premier League kai thar Chhinga Veng FC chu nimin khan Chanmari West lakah fiahin an awm a, MFA Cup leh Aizawl DFA First Division champion hi MPL tawnhriat nei tawh West Warriors nen 3-3 in an inhnehtawk.

I Day Football ni hnihnaah Chanmari West tan Aizawl FC aṭanga an lakluh Laldampuia'n goal hnih a khung a, MPL1 best player R. Laldanmawia'n a club thar tan goal a khung nghal bawk.

Chhinga Veng tan a hmaa hming langsar lo Khawzawl Vengthar tlangval PC Vanlalhmangaihzuala a hmuhnawm a, goal khungtu erawh Lalkhawpuimawia (Mapuia), MS Dawngliana leh Paul Ramfangzauva te an ni.

Goal li phawt

Ruah sur vangin khelmual a huhin nal bawk mah se inkhel a hmuhnawm tho. Inkhel ṭan phatah Chhinga Veng tan Dawngtea'n hun ṭha nei nghal a, MPL1 top scorer hian a pet over. Goal khung tum team pahnih inkhelah Chanmari West an vannei hmasa zawk. Minute 8-na lekah Laldampuia ball pet chu Chhinga Veng keeper R. Lalhmangaihzuala'n dang mah se a per chu Dampuia bawkin pet nghalin a goal chiang hle.

Chhinga Vengin insiamṭhat an tum nghal a, tawnhriat ngah Dawngtea kawp-pui Khawzawl striker PC-a, Van-lallawma leh Lalthlamuana te ball inpe kual a hmuhnawm a, MPL1 best forward Dawngtea siamsak hmang-in Kelkang tlangval Mapuia'n
minute 25-naah goal ropui a thun.

First division lama a thiamzia lantir tawh PC-a'n rintlak a nihzia a tilang chhunzawm a, crossbar a pet per bakah Chhinga Veng goal nawrna thapui pawimawh a ni. Chanmari West-in handball vangin penalty an chawi, a pet turin Dawngtea rawn ding chhuakin Bawngkawn tlangval hian a hlah lo.

First half a tawp dawnah Chhinga Veng keeper Lahmaa ball pet sual chu West Warrior forward Danmawia zawnah a tla a, Sialhawk tlangval hian Dampuia tan siamsak zuiin Chanmari West captain hian an siphurh a sut a, 2-2 niin chawlhlawk an hmang.

Goal hnih dang

Second half-ah Chhinga Veng coach Lalremtluanga'n winger Thlatea la chhuakin Aizawl FC aṭanga an lak winger ṭha H. Lalmuankima a dah lut a, goal khung belh a tum tih a chiang.

Goal khung hmasa zawk erawh West Warriors an ni daih, mual vei lam aṭanga Dampuia ball vawrhluh chu changtu nei lo Danmawia'n chiang takin a pet goal a, inhliam vangin Chhinga Veng tlarhnung a buai tih a takin a lang.

Coach thar leh player thar hnuaia hmasawn Chanmari West an chak mai dawnin a lang hman. Mahse, beidawng duh lo Chhinga Vengin minute 89-naah si phurh an sût -, Paul Ramfangzauva chuan box pawn aṭangin ama insiam chawp hmangin goal
ṭha bik a khung a, goal dang a luh belh tawh lo.

Eng nge an sawi?

Point thum hmu thei dinhmuna an din hnua goal an chhuah leh chungchang sawiin HC Zarzoliana chuan, "Point khat kan hlawh chhuak a ni lo a, point hnih kan hloh zawk a ni. Football-ah chuan duh leh beisei angin thil a thleng vek lo a, vawiin pawh kha kan vanneih ni a nih loh vang a ni. Dinhmun ṭha zawkah kan ding reng a, goal khung belh thei dinhmuna kan din laia kan nawr na tawk thei lo kha a tawpah kan tuar a ni," tiin Vanglaini palai hnenah a sawi.

Chhinga Veng manager H Lalremruata chuan, "Kan midfield kha kan en chuan kan inpawt chawp tih a lang chiang, player inhliam kan ngah avangin kan ṭhat theih dan berin kan khel lo. Kan match leh pekah chuan tun aia ṭha zawka khel thei tura kan insiamrem theih ngei ka beisei. Kan inngahna chu Pathian a ni a, engtiang chena thui nge min hruai dawn hre lo mah ila a tawp min thlen pui kan beisei," tiin champion an beisei thu a sawi.

Team Dinhmun

Group A

# Tean Pld W D L GF GA GD Pts

1 Chanmari FC 1 1 0 0 2 1 1 3

2 Chanmari West FC 1 0 1 0 3 3 0 1

3 Chhinga Veng FC 1 0 1 0 3 3 0 1

4 AIFF Under 19 0 0 0 0 0 0 0 0

5 Aizawl FC 1 0 0 1 1 2 -1 0

Group B

# Tean Pld W D L GF GA GD Pts

1 Dinthar FC 1 1 0 0 1 0 1 3

2 Ramhlun North FC 1 0 1 0 0 0 0 1

3 Zo United FC 1 0 1 0 0 0 0 1

4 Shillong Lajong 0 0 0 0 0 0 0 0

5 Bethlehem VT FC 1 0 0 1 0 1 -1 0