East Bengal lakah Hyderabad an 'comeback'

Indian Super League-ah East Bengal an la chak thei lo - Thawhlehni zanah Kolkata club hian Hyderabad FC hmachhawnin goal khung hmasa mah se a tlawm zawkah an ṭang a, Hyderabad hi 3-2 in an comeback.

East Bengal tan Jacques Maghoma chuan minute 26-na lekah ISL-a East Bengal goal hmasa ber a khung a, half time hma hreta goalkeeper Debjit Majumder-a'n Aridane Santana penalty a dan bawk avangin East Bengal hun a her chhuak ve dawn niin a lang. 

Mahse, beisei ang a ni lo - HFC tan penalty pet goal lotu Santana chuan minute 56-ah si phurh a rawn sut a, second tam pawh a ral hmain an goal hnihna a rawn khung zui.

Hyderabad tan game tidanglamtu chu minute 46-naa bench aṭanga luhtir Liston Colaco a ni a, Goan forward hian Santana goal hnihna hi a siamsak a ni - an goal thumna turah pawh Liston bawk a hmuhnawm a, duhthala Scott Neville leh Sehnaj Singh a lam khum hnuin Halicharan Narzary tan a siamsak a, an goal thumna an khung. 

East Bengal tan Maghoma chuan minute 81-naah goal khat rawn khung ve leh mah se East Bengal an tho chhuak tawh lo a, Hyderabad lakah an tlawm. 

Kolkata club tan Jeje Lalpekhlua'n inkhel bul ṭan mah se Hnahthial tlangval hian ball ṭha a hmuh miau loh avangin 'Jeje tak tak' kan la hmu thei lo. 

East Bengal boss Robbie Fowler chuan, "Ka ngaihdanah chuan I League khel tura team din kan ni. I League khel turin player an lalut a, mahse ISL kan khel ta thut si a ni. ISL khel turin an ṭha tawk tih pholan chu player-te hna a ni," tiin an chak loh chhanah player a mawhpuh.