Chelsea an Comeback Lampard-a nauten beisei an pha lo

The Hawthorns-ah Chelsea an lenglut a, "Barnsley laka goal ruk khungtute hian goal engzat tak khung ang maw?" tiin inkhel thlirtuten zawhna an inzawt. Amaherawhchu West Bromwich Albion-in Callum Robinson goal hnih leh Kyle Bartley goal hmangin first half-ah 3-0 in hma an hruai a, second half-ah Frank Lampard hoten an sut zo hram.

Blues tan hian Mason Mount, Callum Hudson-Odoi leh Tammy Abraham ten goal an khung a, player thar Thiago Silva a mualpho bakah German player manto pahnih Timo Werner leh Kai Havertz ten goal an khung lo.

Chelsea-in Thiago Silva bul an ṭantir a, captain Cesar Azpilicueta bench-ah a awm avangin Brazilian defender hian captain armband a hreng nghal. Lampard-a'n Werner leh Havertz bul a ṭantir a, hmatawng bera awm Abraham lah League Cup-a a che ṭhat avangin beisei an nei sang hle.

Amaherawhchu inkhel a ṭan chauh a, minute lina lekah defender Marcos Alonso tihsual aṭanga ball kal zel chu Callum Robinson-a'n goal hmahruai khung nan a hmang.

Blues ṭantuten tlumte thlira an thlir Silva lah a pawlawh hret a, Callum Robinson-a'n ball chhuhsakin minute 25-naah goal hnihna a khung. Minute 27-naah Baggies-in corner an hmu a, Kyle Bartley-a'n a pet goal.

Chelsea-in keeper sawisel hlawh Kepa Arrizabalaga aiah Willy Caballero an luhtir a, keeper thar Edouard Mendy squad-ah a la awm lo. Blues goal thum chhuah danah keeper dem theih an ni lo a, defender-te erawh mawhphurtu an ni a, team angin Lampard-a naute an khel ṭha lo tih a chiang bawk.

Hawthorns-ah Chelsea an mualpho a, Baggies lakah an mualpho. Technical area-a ngui hmel taka ṭhu Lampard erawhin beiseina a la nei a, halftime a hmang ṭha. Second half ṭan chiahah Alonso aiah Azpilicueta leh Mateo Kovacic aiah Hudon-Odoi luhtirin Blues khelh dan hmang a dang ta bawk.

Chelsea squad thlira an dam kim huna bench-a awm tur bera ngaih Mason Mount-a'n minute 55-naah box pawn aṭangin ṭha zetin a pet goal a, keeper Sam Johnstone a che hman lo.

Minute 70-naah Hudon-Odoi-a'n Havertz nen wall pass hmangin Baggies tlarhnung an ṭhiat a, English winger hian ṭha zetin a pet goal. Goal khungtu pahnih hi Hakim Ziyech leh Christian Pulisic te inhliam vanga khelhna hmun chang thei an ni ber a, Lampard-a tan ngaihtuahna senna tur a awm belh.

A tawpah thilmak a thleng, Baggies-in box chhung aṭangin ball an clear lawk thei lo a, ball-in Havertz-a kut a per. Referee-in a hmuhfuh miau loh avangin Mount-a'n goal-ah petin keeper tih per chu Abraham-a'n injury time minute thumnaah siphurh sut nan a hmang. VAR hmangin en let a ni a, Abraham a offside lo a, chutihrualin Havertz-a handball an en let thlen loh avangin Chelsea an vannei a, point khat an sual chhuak.

Chelsea manager Frank Lampard chuan, "Inzir tur kan neih belh. West Brom kan zah lohna ni lo se point hnih kan hloh. Tihsual vangin hun harsa kan tawng a, tuna kan tihsual anga kan tihsual zel chuan hna a harsa zel ang," tiin a naute khelh danah a lawm lo hle.

West Brom boss Slaven Bilic chuan, "Handball a ni mai thei tih lam a ni lo, a handball. A chiang em em a, sawi zui pawh ka duh lo. Ka nauten point thum hmuh an hmu a, kan hmu lo hi a vanduaithlak hle a ni," tiin a lungawi lo hle.