Pacquiao vs McGregor kan hmu dawn

Boxing khawvela hming dai tawh ngai lo tur Manny Pacquiao-a special assistant Jayke Joson chuan weight division pariata champion thei a boxer chuan UFC fighter lar Conor McGregor a hmachhawn tur thu a sawi. 

Irish fighter McGregor hian Zirtawpni khan twitter lamah Pacman nen hian middle east lama an inhnek tur thu a sawi a, Jayke Joson chuan, "McGregor thusawi hi a dik a, engmah ziah fel la awm lo mah se inbiakna erawh a kal reng a ni," a ti - an inhnek dawn a nih chuan kum 2021-ah a ni thung ang. 

Kum 41 mi Pacquiao-a'n inhnek a hmachhawn hnuhnung ber chu July 2019 khan a ni a, boxing chanchina welterweight champion upa ber ni turin Keith Thurman chu split decision hmangin a hneh. 

January thlaa UFC 246-a Donald Cerrone a hneh hnua fight la hmachhawn leh lo McGregor hian August 2017 khan boxing khawvela sum tamna ber pawlah Floyd Mayweather a lo ngam lo tawh a, sum tamna lam a hawi leh ta niin a lang. 

Pacquiao leh Mc-Gregor hi an inhnek thei a nih chuan Pacman hian a sum hlawh chhuah aṭanga tam tham tak chu Philippines lama coronavirus tuar te ṭanpui nan a hmang dawn a ni.