Pep-a'n City a sâwi danglam mek
Pep Guardiola-a'n Barcelona a enkawl ṭan khan Catalan club-in kalphung fel tak a nei tawh a, amaherawhchu Spanish manager Pep-a hnuaia an kal dan erawh a hma aiin a khauh zawk.
Kum 45-a upa Guardiola hnuaiah Barca-in nomawi chawi theih zawng zawng an la a, Bayern Munich-ah Champions League nomawi chawi ta lo mah se Bundesliga-ah kum thum an champion bakah DFB Pokal-ah vawi hnih an champion. Spanish manager hian City-ah a hun tawp hman a tum loh thu sawi tawh mah se hlawhtling tur leh a theihna fiah turin Premier League a pan tih hriat a ṭha.
Ti ṭha tan chauh
French defender Gael Clichy chuan Manchester City-a an pu tharin 'pizza' bakah rih awlsam theihna chaw a khap thu a sawi a, mahni rih dan tura aia rit player chu ngai an awh hma chu first team training-naah an tel a pha loh thu a sawi chhuak.
Kum 31-a upa Clichy chuan, "Field chhung emaw field pawn emaw pawh ni se thil hotea kan ngaih thlengin a ngai pawimawh vek. Rih tur zata aia rit tan team training-a zawm theih loh. Hei hi coach tam tak hian an ti turah an ngai ṭhin a, amaherawhchu a tak tak ti thei coach ka hriat vawi khatna a ni. Tunah hian player ṭhenkhat chuan an rih vangin team training an zawm lo a ni," tiin City-in Pep-a an hmelhriat
ṭan thu a sawi.
Khawthlang media lam chuan rih vanga practice lo zingah Sa-mir Nasri pawh a tel niin an sawi a, Clichy chuan Pep-a chanchin sawi zelin, "Player tinin theihna an nei ngei a, mah se an rih tur baka an rih chuan an ṭhat dan turin an ṭha thei lo. Manager hian pizza bakah rihna lam chi reng reng chu ei a phal lo," tiin huaisen taka team a enkawl thu a sawi.
Arsenal defender hlui Clichy chuan City-in season liam taa Manuel Pellegrini thlak nana Pep Guardiola an hmang dawn tih an hriat hnua an khelh ṭhat tawk loh chu coach thiam loh ni loin player-te thiam loh nia a ngaih thu a sawi tel bawk.
Dortmund nen
Vawiin tlai dar 5:00 hian City-in an ṭhenawm club Manchester United sawptu Borussia Dort-mund an hmachhawn dawn. Longgang Stadium, Shenzhen, China-ah hian mipui 60,000 an leng a, inkhel hi Sony ESPN-ah pekchhuah a ni ang.
Bundesliga club Dortmund hian Mats Hummels, Henrikh Mkhitaryan leh Ilkay Gundogan te chhuah mah se Mario Gotze, Andre Schurrle, Sebastian Rode, Ousmane Dembele, Marc Bartra, Emre Mor, Raphael Guerreiro leh Mikel Merino te an lakluh avangin an ṭhat dan a la ngai rengah a ngaih theih.
Thomas Tuchel hote hian China-ah United chu 4-1 in an hneh a, Jose Mourinho chuan German club chu training an neih rei tawh avangin an hriam tawh thu a sawi. Portuguese manager-in fiahna a paltlang lo a, vawiin tlai hian Pep Guardiola chu Dortmund hmaah fiahin a awm thung ang.
International Champions Cup
Fixture (Live@SonyESPN)
Vawiin
5:00 AM Real Madrid Vs PSG
7:00 AM Bayern Munich Vs AC Milan
9:00 AM Chelsea Vs Liverpool
5:00 PM Borussia Dortmund Vs Man City
July 29, Zirtawpni
3:30 PM Tottenham Vs Atletico Madrid