Season bul ṭan lo tur Per Mertesacker

Arsenal manager Ar-sene Wenger chuan a defender rinrawl Per Mer-tesacker chu hliam vangin thlakhat aia rei a chawlh a ngaih tur thu a sawi. August 13-ah Premier League ṭan a nih tawh dawn avangin season ṭan tirah Gunners hian an captain thar hi an chhawr thei dawn lo.

German international hlui Mertesacker hian kar hmasa Zirtawpnia Lens nen 1-1 a an inhnehtawk
ṭum khan a khupah hliam a tuar a, season thar in-buat--saih nana United States pan tur zingah a tel ve theih loh phah.

Kum 31-a upa hian Bundesliga club Werder Bremen aṭangin 2011 khan Gunners hi a zawm a, season hmasa khan hliam vangin league match 24-ah chauh inlan mah se pahnihna an nih theih nana player pawimawh a ni.

Tun dinhmunah Ar-senal hian defender tawn-hriat nei chhawr tur an nei tam lo hle, Laurent Koscielny chu Euro 2016 khelh vangin a la chawl mek a, Gabriel Paulista pawh dam lohna a neih avangin a la inkhel thei lo. Arsenal tan inelna hrang hranga match 22 khel tawh kum 21-a upa Calum Chambers chu centre back an neih ṭhat a ni rih.

Gunners hian kar-tawpah hian MLS All Star an hmachhawn dawn a, Lens an khelh ṭuma inlan lo Santi Cazorla chu a inkhelh theih a beisei awm tawh bakah player naupang rual Jeff Reine-Adelaide, Chris Willock leh Gedion Zelalem te hmel kan hmuh a beiseiawm.

French manager Wenger chuan, "Per Mer-tesacker hian Lens kan hmachhawn ṭum khan a khupah hliam a nei a, endik a nih hnuah rin aiin a lo nasa. A chawlh chen tur sawi thei chiah lo mah ila thla khat aia rei a ngai ang," a ti. French manager hian a defender chawlh hun chhung tur hi sawi chiang lo mah se report ṭhenkhatah chuan thla nga nia tarlan a ni.

Zawhna chhangin Wen-ger chuan, "Tlar-hnung-ah tawnhriat ngah kan melh a ngai dawn tihna a ni, tun kartawpah erawh naupang zawkten khelmualah hmun an chang ang," tiin a sawi.