Joe Allen lakluh loh Swansea tan a pawi

Swansea City striker hlui Dean Saunders chuan Liverpool aṭanga an midfielder hlui Joe Allen an lalut thei lo chu an tan chuan channa nasa tak a nih thu a sawi. Wales midfielder hian Stoke City chu pound maktaduai 13-in a zawm a ni.

Saunders chuan, "Sir Alex Ferguson meuh pawhin Allen hi Euro 2016 a khelh dan avang khan a fak takzet a, Aaron Ramsey emaw Gareth Bale hming erawh a lam ri lo hrim hrim. Kan lalet thei lo hi kan tan chuan channa a ni," tiin a sawi.

Kum 2012-a Swansea aṭanga Liverpool zawmtu midfielder hi Welsh club hian pound maktaduai 8-a laklet tumin June thla khan an dawr a, Liverpool chuan an hnar. Stoke City-in pound maktaduai 13-a an dawr hnuah Swans chairman Huw Jenkins chuan Potters dawrna ang zat hian an dawr ve leh tur thu sawi mah se Swansea inngaihtuah chhungin Stoke a pan.

Wales tana vawi 75 lo inlan tawh Saunders chuan sawi chhunzawmin, "Mark Hughes leh Allen hi an inhre ṭha em em a, mah se Swansea fan ka nihna vangin kan tana ṭangkai tur player kan lalut thei lo hi pawi ka ti takzet a ni," a ti.

Swansea leh Wales tana Allen lo khelhpui tawh ṭhin Owain Tudur Jones chuan nakin lawka captain din-hmun luah thei tur an chan thu a sawi ve bawk a, Allen an lalet thei lo chu pawi a tih thu a sawi ve bawk.