Barcelona-in sum an huilut hnem
Spanish club Barcelona chuan season hman zawh taka an sum lakluh zat an tarlang a, season tluana an sum hmuh zat belhkhawm hi pound maktaduai 569.57 a ni - Barcelona chanchinah tun hma lamin kum khatah heti zata tam sum an la huilut ngai lo.
La Liga champion hian Thawh-ṭanni khan an sum hmuh zat hi vantlang hriatah an puangzar a, an beisei phak baka sum an huiluh thu an puang. Catalan club hian chhiah an pek hnua hlawkna an tel chu nikum chhung khan pound maktaduai 24.33 a ni.
Barca hian kum 2021-ah chuan pound maktaduai 800 chuang lakluh theih tumin ruahmanna an siam mek a, tuna an sum hmuh dan ngaihtuah chuan an target hi an tlin a nih pawhin a mak lo ang.
Nou Camp an thlak
Catalan club hian hmalakna hrang hrang an ruahman zingah Nou Camp siamṭhatna tur "Espai Barca" project an ruahman a, an tum dan chuan mipui 105,000 leng turin sta-dium hi zauh an tum. Tun din-hmunah chuan Nou Camp-ah hian mipui 99,354 an leng mek.
Barcelona hian an stadium siam-ṭhat hna hi an thawk
ṭan der tawh a, khelmualah phul thar phah mekin an phul phah hi 'hybrid pitch' niin natural grass leh artificial grass inchawhpawlh a ni a, hetiang hi Premier League-a club tam zawkin an hmang tawh.
Sum hmanna
Barcelona hian season hma-sa ṭan dawn khan player lakluh nan ringawt pound maktaduai 52.85 an seng a, players hralhchhuahna aṭangin pound maktaduai 44.46 an lalut thung. Season hman zawh takah khan Barcelona hian April thleng khan an jersey maktaduai 3.637 an hralh chhuak a, khawvel football club-a jersey hralh hnem ber an ni.
Manchester United-in tun season-ah Zlatan Ibrahimovic-a jersey hralhna aṭang ringawtin a tlem berah pound maktaduai 50 hmuh theih an inbeisei a, Lionel Messi, Luis Suarez leh Neymar neitu club hian jersey an hralhna aṭang ringawta an sum hmuh zat tur hi a tam tham khawp ang.
Barcelona hian tun season-ah player lakluh nan pound maktaduai 87 bawr vel an seng leh der tawh a, player hralh-chhuah na aṭanga an sum hmuh let erawh pound maktaduai 11.41 bawr vel chiah a la ni thung.
Ticket man an puang
Barcelona vice president (social department ) Jordi Car-doner chuan Thawhlehni khan season lo awm tur atana 'season ticket' man zat a puang zar. Barca season ticket manto ber hi £920.20 (Rs 80,987) a ni a, a man tlawm ber erawh £110.73 (Rs 9677.88) man a ni thung.
Cardoner chuan, "Barcelona chuan khawvela football hmuh-nawm ber chu khawvela ticket man tlawm ber hmangin fan-te tan a zuar chhuak a ni," tiin an ticket man chu a fak thiam hle.
Catalan club hian an club chhungkuaah member 143,459 an nei mek a, member zingah 74% hi mipa niin 26% chu hmeichhia an ni a, member zinga 20% zet chu kum 15 hnuailam an ni. La Blaugrana (Barcelona sawina) member zinga 92% hi chu Spain aṭanga indang duh catalan hman an ni.