Minute 100-naah Man United an chak

Manchester United chungah vanneihnain thla a zar a, Ole Gunnar Solskjaer-a hoten Inrinni zan khan injury time-ah Brighton & Hove Albion 3-2 in an hneh hram. United-in chakna goal an khung hma hian referee Chris Kavanagh-a'n hun tawp hamrik a ham ri hman a, amahaherawhchu VAR hmanga an en let hnuah penalty hmuin Bruno Fernandes-a'n chakna goal a khung.

Amex Stadium-ah Crystal Palace laka khel nawi Man United an la ngai reng a, chutihrualin Brighton nena an inkhel hi game level san vang ni loin goal luh hun avangin hun tawp thlengin boruak a sang hle. 

Neal Maupay-a'n minute 40-naah panenka hmanga penalty petin goal hmahruai a khung a, Brighton defender Lewis Dunk 'own goal' hmangin United-in siphurh an sut.

Minute 55-naah Marcus Rashford-a'n vei lam aṭanga ball lalutin Brighton defender-te box chhunga a bum kual hnuah ṭha zetin United hma hruaina a khung. Ole Gunnar Solskjaer hote insiamrem chho mai tura ngaih an nih laiin an talbuai chho tulh tulh a, goal ban chu United ṭhianṭha ber a ni a, an him hram hram. 

Brighton an khel ṭha zawk a, minute 90 chhungin mualneitu hian woodwork vawi nga zet an tih per. Solly March-a ban pet per te, first half-a vawi hnih woodwork tih pertu Leandro Trossard-a'n hnai set sawt aṭangin crossbar a pet per leh a, keeper David de Gea a khel ṭha tel tih hriat a ṭha bawk. 

Injury time-ah erawh United an ṭang tluan thei ta lo a, March-a'n injury time minute thumnaah siphurh sutna goal a tauh lut. Solskjaer-a hoten an goal neih an hum thei lo a, point hmuh an phu lo chungin point khatah an lungawi chuang lo. 

Hun tawp hma hretin corner an hmu a, Harry Maguire-a ball tauh chuan Neal Maupay kut a fuh thawi a, referee Chris Kavanagh-a'n penalty-ah ngai loin inkhel a ham tawp. Amaherawhchu VAR hmangin en let a ni a, Maupay kutin ball a fuh miau avangin United-in penalty an hmu a, pressure sang tak hnuaiah Fernandes-a'n chakna goal a khung.