Khawvela player man to 3-na Higuain
Juventus chuan Napoli aṭangin Gonzalo Higuain an lalut fel ta. Argentina striker man zat hi pound maktaduai 75.3 niin khawvela player man to lama pathumna a ni - Cristiano Ronaldo (£80m) leh Gareth Bale (£85m) te chiah a chungah an awm.
Kum 28-a upa Higuain hian Turin club tan hian kum nga daih contract a ziak a, a man hi pek tlak nghal vek ni loin Italian club pahnih hi ṭum hniha inpe zo turin an inrem. A hlawh zat tur hi tarlan ni chiah lo mah se season khatah pound maktaduai 6.3 vel ni tura ngaih a ni.
Higuain hi France rama piang ni mah se Argentina tan a khel a, khawvela striker hriam berte zinga mi ni mekin Premier League club lian Arsenal nen pawha sawi zawm ni hman mah se North London club aiin Juventus an chuh chak zawk.
Goal khung thiam
Kum 2013 khan Real Madrid aṭangin pound maktaduai 34.5-in Serie A club Napoli chuan Higuain hi an lalut a. Argentina striker hian Santiago Bernabeu Stadium-ah season ruk leh a chan ve hun a hman chhunga goal 107 a khung hnuah pawh Stadio San Paolo-ah a theihna san zia pholang chhunzawmin goal khung loin a awm thiam lo a ni ber!
Higuain hian Napoli tan Serie A match 104 a khelh aṭangin goal 71 zet a khung hman a, season hmasa khan league match 35 a khelh aṭangin goal 36 a khung thei hial - league nomawi chawi lo mah se Juve chiah tluk loh an nei. Naples club tan hian Coppa Italia leh Supercoppa Italiana nomawi a chawi hman.
Goal khung aia a venhim lam an ngaihpawimawhna Serie A-ah hian striker aiin defender an langsar fo a, Spain leh England te nena khaikhinin goal khung a harsa zawk niin a lang. Higuain hian season liam ta khan Capocannoniere (Serie A Golden Boot) golden boot dawng turin goal 36 a khung a, Serie A-a hetiang zat khung ve thei chu Gino Rossetti niin 1928-29 season daih tawh khan Torino tan goal 36 a khung.
Kum 2000 hnu lama Serie A-a goal 30 aia tam khung thei chu 2005-06 season-a goal 31 khungtu Italian striker Luca Toni chiah a awm a, Fiorentina striker hmaa goal 30 khung tling thei chu 1958-59 season-a Inter tana goal 33 khungtu Antonio Valentín Angelillo a ni. Record thlir letin Serie A-ah goal khung tam a har a, hei hian Higuain-a ropuina a pholang.
A man a phu?
Tunlai sum dinhmun thlirin khawvel huap pawha player langsar ni lem lo lakluh nan pawh sum sen hnem a ngai tawh a, player vantlang lei tur pawhin pound maktaduai 30 bawr vel hman a ngai zel. Argentina tan match 63 a khelh aṭanga goal 30 khung thei hi a kum leh tun dinhmuna a khelh dan ngaihtuah chuan man tlawm taka lei theih a ni lo tih a chiang.
Pound maktaduai 75.3 hi Cham-pions League nomawi chawi pui phah theihna tur lei nan chuan a toin a lang lo. Mahse, Higuain tel lo pawha a zawna vawi nga league champion ni thei Juve hi Europe-ah an hlawhtling chuang lo a nih chuan Serie A golden boot kawltu man zat hi a to an la ti thei bawk.
Napoli tan pound maktaduai 34.5 a an lakluh 75.3 zeta hralh chhuah leh chu sum lama hlawkna hlang a ni. Hetih rual hian an elpui laka an player ṭha ber chhuahtir hi nomawi beiseina titawptu a ni zui thei bawk. Juve-in anmahni hnaih thei ve thei ber Napoli aṭanga an striker duhlai an chhuhsak hi tun nipui transfer chhunga sum hlawm hmanna lian ber a ni a, hei aia lian hi a thleng chhunzawm lo ang tih a sawi lawk theih loh.
Engtin zel...
Manchester United-in free transfer-a an chhuahtir tawh midfielder Paul Pogba chu Old Trafford-ah hruai let an duh. France international hi an lalet a nih chuan pound maktaduai 100 bawr vel an hman a ngai dawn a, khawvela player manto ber a ni ang.
Tun hnaiah Juve hian Miralem Pjanic (£27m), Marko Pjaca (£19m), Dani Alves (free) bakah Bayern Munich defender Medhi Benatia chu loan hmangin an lalut tawh bawk a, an player ṭha neih sa nen harsa vak loin Serie A nomawi chu an chawi thei tura ngaih a ni.
Mahse, an midfielder pawi--mawh Pogba hi chhuah ta se Champions League-ah Bayern Munich, Real Madrid, Bar-ce-lona leh Atletico Madrid te an el phak ang em tih chu zawhna awm thei tak a ni.
Khawvel player man tote
Man zat Player Insawn kum Insawnna
£86m Gareth Bale 2013 (Tottenham to Real Madrid)
£80m Cristiano Ronaldo 2009 (Man United to Real Madrid)
£75.3m Gonzalo Higuain 2016 (Napoli to Juventus)
£71.5m Neymar 2013 (Santos to Barcelona)
£65m Luis Suarez 2014 (Liverpool to Barcelona)
£63m James Rodriguez 2014 (Monaco to Real Madrid)
£59.7m Angel Di Maria 2014 (Real Madrid to Man United)