Klopp-a'n Sakho a thawn haw

Liverpool manager Jurgen Klopp chuan, defender Mamadou Sakho chu USA-a pre-season tour an neihna tur aṭangin a thawn haw.

Liverpool club video-a a lan danin Sakho hi midang zawng aia tlaiah airport a thleng a, San Francisco-a Alcatraz Islanad-a an awm laiin manager Klopp interview lai chu tibuaiin, "Engtia rei nge he hmunah hian chen theih i inbeisei?" tiin fiamthu a thawh.

Kum 49-a upa manager hian, "Chutiang ka ngaihtuah buai a ngai lo - nangma ngaihtuah tur a ni. US kan pan dawn hian mi pakhat chauh a tlai a, chu chu nangmah i ni," tiin a chhang a, khawthlang media-te chuan French defender thawn haw a nih chhan hi a tlai vang hi niin an tarlang.

French defender chunga thu-nunna lantir anga tarlan hi Liver-pool chuan an la chhang lo a, a ke hliam enkawl tura haw a nih thu erawh an sawi thung.

Kum 26-a upa Sakho hi thau tih tlemna damdawi hmanga puhin UEFA chuan March thla khan lo chhui tawh mah se a damdawi hman hi hman phal loh zingah a tel lo tih hmuhchhuah niin hremna pek a ni lo.