Baggies-in Manchester City meuh chelh Mahse Bilic an ban, Big Sam hming a ri
West Brom-in Thawhlehni zan khan champion tura rinkai Manchester City chu 1-1 in an chelh a, Premier League kai thar tan result ṭhaah ngaih ni mah se manager Slaven Bilic an ban. Croatian manager thlakna tur hian Sam Allardyce, Nigel Pearson, Mark Hughes leh Eddie Howe te hming sawi rik a ni a, club tenau enkawl thiam Big Sam hming a ri ring ber.
Manchester City-in tun season-ah eng ruai an ang thei lo, Etihad Stadium-a West Brom draw hi ropui lo tak a ni. City tan Ilkay Gundogan chuan minute 30-na lekah goal hmahruai a khung a, mahse, City goal venhim hna thawktu Ruben Dias chuan Baggies tan hna thawhsakin an lamah a ti lut a, 1-1 in inkhel a tawp.
Manchester City boss Pep Guardiola chuan, "Hetiang ang game-ah chuan hnehna chang tur kan ni," tiin an result-ah a lawm loh thu a sawi a, table-ah parukna an ni mek.
A goal hma
Etihad Stadium-ah rin lawk ang ngeiin City-in goal an khung hma a, minute 30-na lekah midfielder Ilkay Gundogan chuan Raheem Sterling-a siamsak chu goal-ah a chantir - zawhna chu, "City-in eng zat tak khung belh ang maw?" tih a ni.
Mahse, City-in ball an chang hnem chungin goal an zawng hmu lawk thei lo a, minute 43-naah an chhuah ta zawk. Baggies centre back Semi Ajayi-a shot chu a out dawn niin lang mah se Ruben Dias-a per a, ball kal danin City keeper Ederson-a bum avangin goal-ah a lut.
Mak tiin City an hawihai a, beisei loh goal neitu Baggies an hlim thung - tun season Premier League-a goal chhuah hnem ber team hian an league match hmasa 12-ah goal 25 chhuah mah se attacking football hmuhnawm khel ṭhin City lakah an tlarhnung an ding khawng tlat!
City-in 77% ball chang a, vawi 26 zet shot an nei chungin goal an zawng hmu zo lo a, a tawpah point khata lungawi lo chunga lungawi zir a ṭul - Etihad Stadium an lenluh hnuhnung pakuaa tlawm vek Baggies-in thawnthu thar an ziak ve ta.
Chak ngai, chak si lo
Manchester City-in an mualah rin loh takin Baggies an inhnehtawkpui a, khawvela coach hlawh hnem ber Pep Guardiola tan lawm taka result pawmna chi a ni lo.
Spanish coach chuan, "Season rei tak a ni dawn a, mahse, a chung lama awm tur chuan zanin angah khan chak tur a ni a, mahse kan ti miau si lo. Chance kan siam a, inkhel kan thunun a, mahse a pawimawh ber chu hnehna chan a ni. Football tana pawimawh chu result a ni," tiin a sawi.
City tan Sterling, Benjamin Mendy leh Rodri-ten chance duhawm nei mah se an chhawr thei lo vek a, hliam vanga a hun tam zawk khelmual pawna hmangtu Sergio Aguero chu minute 76-naah bench aṭangin luhtir ni mah se inkhel result a thlak danglam thei bik lo.
Baggies boss Slaven Bilic chuan, "Tlarhnung lam kan rem phui ṭha hle a, point pawimawh tak a ni. Kan nun humhim nan kan ding tlat a, midang tana thih huam vekin kan khel - kha lo liam beisei tur a awm chuang lo," tiin a sawi mah se a hna a hum zo lo.