Lyon-in Arsenal dilna hnawl

French Ligue 1 club Lyon chuan, Premier League pahnihna Arsenal-in an forward Alexandre Lacazette lei tuma an dawrna chu an hnawl sak.

Kum 25-a upa Lacazette hian season hmasa khan league match 34 a khelh aṭangin goal 21 a khung a, tlarhma lama duhthlan tur nei tam lo Arsene Wenger-a'n lakluh tumin pound maktaduai 29.3 theh chhuak phal mah se Lyon hian an duhlai hi an chhuah phal rih lo.

Ligue 1 pahnihna Lyon chuan, "Alexandre Lacazette lakluh duhin club ṭhenkhat hming lamrik ni mah se a tak min dawrtu chu Arsenal an ni. Gunners hian pound maktaduai 29.3 an phal nachungin kan player hi kan tan a pawimawh vang leh season thara hmasawn kan tumna kawnga mi ṭangkai tur a nih avangin an dilna hi kan hnawl," tiin thuchhuah an siam.

Khawthleng media ṭhenkhate chuan North London club hian Lacazette manah hian pound mak-taduai 42.2 an phal niin an sawi a, hei erawh Lyon lam hian thu belh-chian dawl lo a ni thu an tarlang.

Gunners hian Olivier Giroud leh Danny Welback te nei mah se anni an chet fuh lo nia thlaktu tur an nei loh bakah France leh England international player te hian an club hi an champion pui thei rih lo. Wenger-a'n an duh leh mamawh an hmu a nih chuan sum an hman hnem hreh loh tur thu a sawi tawh a, hman tur nei mah se lak tur an la hmu lo niin a lang. Sum hman nei tur ngah inti chunga player manto lei ngam lo manager hian a squad ti chak turin hma a la dawn em tih chu hunin a hril chho ang.