Season Opening final-ah TBL Vs Tuikual South

MSSC Ruby Jubilee Commemorative & MBBA Season Open Basketball Tournament 2016 chuan a hmawr an bawk hnai ta. Nimin khan semifinal khelh niin Khatla TBL leh Tuikual South ten final an lut.

Final hi July 30, Inrinni tlai dar 2:00 hian Hawla Indoor Stadum-ah khelh a ni ang. Inelnaah hian team 54 telin MSL club paruk, Division I club panga leh Division II club 43 te an inel.

Khatla TBL hian final lut turin Zarkawt Serpents chu 80-74 in an hneh a, Eddie Zaithanmawia'n point 18 zet neiin MSL2 MVP Van-lal-muana'n point 13 a nei ve bawk. Tuikual South BC-in Mission Veng Vikings chu 76-53 in an sawp ve bawk a, TKS tan Lalrohlua (16 pts), Zodinthara (12 pts) leh Eddie Zothanpuia (10 pts) te an langsar hle.

Tuikual South leh Khatla TBL hi MSL2 final-ah an inhmachhawn a, state pawn player nei ṭha zawk TBL an chungnung. Tun ṭumah hian Mizo hlang ve vein an khel dawn a, H. Laldinsanga kaihhruai TBL nge KC Lalliantluanga enkawl TKS ṭha zawk a hriat ang.