Adesanya ngam thei an awm lo

Mipui nghahhlelh UFC 253, Abu Dhabi a neihah nimin khan Israel Adesanya chuan harsatna nei loin amah ang thoa tlawm la nei ngai lo Paulo Costa chu a tukdawl a, second round-ah technical knockout hmangin chak zawkah puan a ni.

Kum 31 mi Adesanya hian round khatna aṭangin a ke a hmang hnem a, round khat chhung hian vawi 15 ngawt a ke a thawh hman - rin lawk ang aiin Costa a dawh thei a, atthlak taka a khingpui hi attack a tum lo. Second round-ah pawh Adesanya hian a ke lam bawk a  hmang ngun a, a tawpah Costa insum zo loin hnaichilh a tum chu a chesual - Adesanya hian bawhzuiin a hnek chhunzawm a, chak zawkah puan zui a ni. 

Kum 31 mi Adesanya-a'n fight a hmachhawn vawi 20-ah vawi 20  hnehna a chang ta a, Costa lakah  UFC Middleweight kawnghren a kawl lai a humhim bawk. Kum 29 mi Costa tan erawh vawi 14 inhnek a hmachhawna a vawi khat tlawmna a ni thung. Adesanya chuan, "In lo theihnghilh tawh mai thei a, ka hrilh leh duh che u chu, a ṭha ber kan ni tih hi a ni," a ti a, UFC 254-a Robert Whittaker nena inhnek tur Jared Cannonier-a cho zui bawk. 

New Zealand-a piang, Nigerian tlangval Adesanya chuan, "Jared-a tha thona hi ka ngaihsan chu a ni. Whittaker-i hneh a nih chuan i lam ka lo hawi ang," a ti. UFC 253 a inhnek ngaihven hlawh dangah Polish fighter Jan Blachowicz chuan Jon Jones-a kalsan UFC light heavyweight title hlawh chhuak turin Dominick Reyes chu round hnihnaah  technical knockout hmangin a hneh ve bawk.