Fury vs Joshua: A thlen ngei hmel
Tyson Fury promoter Frank Warren chuan a boxer leh Anthony Joshua inhnek thlenna tur dal theitu chu 'chapona' chauh a nih thu a sawi a, khawvelin British heavyweight boxer rothap pahnih inhnek lai a hmu ngei dawn niin a lang.
Kum 31 mi Joshua hian Pathianni zing khan IBF, WBA leh WBO heavyweight kawnghren a kawl lai chu Kubrat Pulev lakah a hum a, Bulgarian boxer-a hneh hnuah hian Fury a cho zui - Fury pawhin Joshua chona hi a chhang zui a, boxer pahnih inhnek hi mi tam takin an hmu châk.
Warren chuan, "Boxer pahnih hi an inhnek dawn a nih chuan vawi hnih fight nei thei tura inremna neih a ngai dawn a, a hun leh a hmun a zirin pound maktaduai 300 aṭanga 500 thleng sum hailuh theih a ni ang," a ti.
Fury promoter chuan sawi zawmin, "He inhnek a thlen theihna tura inrawlh zawng zawngte chuan mahni inngaih pawimawhna leh chapona te kan dah ṭhat vek a ngai dawn a ni," a ti a, boxer pahnih team-ah indah sang bik an awm chuan inhnek a thlen theih a ring lo.
Kum 32 mi Fury hi WBC world heavyweight champion ni lai a ni a, Joshua-a'n heavyweight boxing-a title lian tham dang pathum a kawl bawk - boxer pahnih hi an inhnek a nih chuan boxing chanchina heavyweight title pali an inchuh vawi khatna a ni ang.
Joshua promoter Eddie Hearn chuan boxer pahnih inhnek theih nan hian inbiakna rei tak neih a ngaih a rin loh thu a lo sawi tawh a, chutihrual chuan boxing organisation lam aṭangin harsatna awm ve thei a ni bawk.
Fury hian Deontay Wilder hmachhawn a tum tawh loh thu sawi mah se an contract-ah a vawi thum nana inhnek theihna dan a awm miau avangin American boxer hmachhawn tura tih a ni mai thei a, WBO lamin Joshua hmachhawn turin Oleksandr Usyk an nei sa bawk.
Mahse, Warren chuan, "Inhnek hi a thlen ngei ka ring tlat. Boxer pahnihin inhmachhawn ngei an duh a, promoter leh manager kan nihna angin thlentir ngei hi kan tih tur a ni bawk. UK-ah inhnek ngei se ka duh a, chutihrual chuan Covid-19 inkhuahkhirhna dan avangin nakkum June hma chuan a thleng kher lo mai thei. Chumi a nih chuan UK pawn, sum tam theihnaah kan kal ang," tiin a sawi.