Real Madrid an chak hram

Inrinni zan La Liga inkhelah Real Madrid chuan 3-2 in player 10 a inkhel Real Betis an hneh a, own goal leh penalty-in a puih tel bawk avangin Real an vannei tih loh rual a ni lo. 

Real Madrid tan Federico Valverde  leh Sergio Ramos (penalty) ten goal khat ve ve an khung a, Real Betis defender Emerson chuan an lamah a ti lut bawk. 

Betis tan hian Aissa Mandi leh William Carvalho te chuan goal khat ve ve an khung bawk a, mahse Real vanneih zan a ni miau a, Madrid khaw club laka an goal hnih hian a chhan zo lo. 

Real Madrid hian an league match hmasa berah Real Sociedad chu goal khung loin an inhnehtawkpui a, champion lai tan chuan season bul ṭan dan duhawm a ni lo.

Betis lakah chak duhin Real an tuihal tih a lang nghal a, Valverde chuan minute 14-na lekah goal hmahruai a khung nghal - mahse, Real beisei ang erawhin thil a kal lo chiang hle. Mualneitu Betis tan Aissa Mandi chuan minute 37-naah an si phurh a rawn sut a, Real an insiam rem hmain William Carvalho chuan goal rawn khung zui ve in 2-1 in hma an hruai fel der. 

Betis laka 2-1 a tlawm chungin Real-in chawlhlawk an hmang a, second half ṭan aṭanga minute thumna lekah an si phurh an sut zo thung - mahse Betis lam khungsak a ni!

Brazilian right back Emerson chuan an lamah ti lut palhin Real si phurh a sutsak a, second half chu Emerson channa a ni - a ṭha lam zawng a ni lo thung a, kum 21 mi defender tan zan theihnghilh tlak a ni. 

Emerson hian a tihsual thup nana a insiamṭhat hmain Real midfielder Luka Modric lakah 'professional foul' a nei a, referee-in red card pein a hnawt chhuak zui. 

A tam zawka khel an ni chungin Real hian goal an khung chhunzawm lawk thei lo a, hun tawp nan minute riat chiah a awm tawh tihah an vanneihna a her chhuak nawn. 

Marc Bartra handball vanga an penalty hlawhchhuah chu captain Sergio Ramos chuan goal-ah a chantir a, La Liga season 17 chhung a zawna goal khung thei pathumna dinhmun luah tur hian 'panenka' hmangin a pet goal. 

Ramos hma hian Agustin Gainza (19) leh Carlos Alonso (17)-te chu La Liga a season 17 chhung a zawna goal khung thei an lo ni tawh a, Ramos-a record chelhpuite hi striker ve ve an ni thung. 

Inrinni zana Real vanneihna thlentu pakhat chu video assistant referee a ni a, Emerson hnawhchhuah a nih dawn khan VAR rawn phawt niin Real lawmna turin thutlukna an siam. 

Real-in penalty an hlawhchhuah danah pawh sawisel theih tak a awm a, Barcelona defender hlui Marc Bartra-a'n a kutin ball tawk fuh ngei mah se Real Madrid striker Borja Mayoral a inrawlh avangin ennawn a ni - hei pawh Real lawmna tur thoin thutlukna siam a ni. 

Zinedine Zidane-a nauten league match hnih an khelh aṭangin point li an nei ta a, an nomawi humhim an duh a nih chuan insiamṭhat an mamawh tih erawh an hai bik lo ang.