I Day Football 2016 Chhun dar 12-ah Lajong Vs BVT

North East club zinga I League-a daih rei ber Shillong Lajong-in vawiin chhun dar 12 hian Lammualah Bethlehem Vengthlang FC an bitum dawn.

I Day Football inelna hi group stage chauh a la ni nachungin khelmual chhung boruak erawh a sang tawh hle.

MPL4 semifinalist BVT hian Kolasib midfielder Lalrintluanga (Tuka) chu Dinthar FC an hneh loh ṭuma red card a hmuh avangin an chhawr thei dawn lo a, point an la hmuh loh avangin Shillong club lakah an insiamṭhat vat an mamawh.

Champion lai?

Aizawl FC chu champion lai an ni ngei a, amaherawhchu 2011 champion Lajong hian I Day Football champion nomawi nen Shillong an pan hnua Mizoram tualchhung inelna ngaihhluta an rawn tel lehna hmasa ber a ni.

Lajong hi Mizo club-te tan fiahna ṭha a ni dawn a, kum nga hnua hmasawnna hi eng ang chiah nge tih a hriat chhoh ang.

Shillong club hi I League nena khaikhinin an ṭha tawh lo zawk a, chutihrualin Mizo club nena khai-khinin budget lian tak leh kal-phung mumal tak an neih avangin champion tura rinkai an la ni reng.

Lajong chu

Goalkeeper Vishal Kaith chu rawn zin mah se ISL a khelh dawn avangin inkhel thlirtu a ni dawn a, I League-a la inlan lo Phurba Lachenpa tan coach hminna hun ṭha a ni thei ang.

Tlarhnungah I League-a vawi kua lai inlan Nim Dorjee Tamang (J no. 3) leh Shillong league-a tawnhriat nei ṭha tawh Sandeep Singh (J no. 5) te chu an inkawp hmel a, left back-ah I League-a vawi 15 zet inlan thei Pritam Kumar Singh (J no. 23) a awm bawk ang. Right back-a khel turin Lengpui rawlthar Joe Zoherliana (J no. 27) dinhmun a ṭha hle.

A sira tlan thiam I League-a tawnhriat nei ṭha tawh Redeem Tlang (J No. 19) leh Bipin Singh (J No. 25) te an kawl a, ven tham an tling dawn. Midfield laiah hian Police midfielder ṭha V. Lal-
ṭanpuia nau Jacob Lalrawngbawla (J No. 14), Joseph Lalfakzuala (J No. 12) leh Shillong lama ball thiam vanga lar Hardy Cliff Nongbri (J No. 11) ten khelhna hmun an inchuh dawn niin a lang.

Lajong hmatawnga awm tur hi Zembawk tlangval Samuel Lalmuanpuia (J No. 9) a nih hmel a, I League-a Aizawl FC nen an inkhelh ṭuma Hero of the Match hnungah Chhinga Veng tlangval Lalrammuana (J No. 22) emaw Milan Basumatary (J No. 16) emaw dah a ni ang.

Hman ni lawk khan Lajong Youth team chu 8th Bodousa Cup 2016-ah an champion a, Milan Basu-matary hi final-ah man of the match a nih bakah inelnaah goal 11 khungin top scorer a ni. Lajong Youth team-in Assam-a inelna lian an khelh ṭum hian Mizo rawlthar defender Lal-hmangaihsanga'n inkhel bul a ṭan bawk.

Shillong club hian Nilaini zing khan Aizawl an rawn thlen hnua an training hmasa ber RG Stadium-ah an nei a, nimin khan Lammualah inpuahchahna an nei leh bawk.

Coach Thangboi-a'n an player-te hi duhthusamin an fitness a la ṭha lo ti mah se, an training thlirin football hmuhnawm an lantir theih a rinawm.

BVT lam hi

Bethlehem Vengthlang coach Lalbiaksanga Colney chuan, "Insiamṭhat kan mamawh a, chumi tur chuan kan khelh dan pawh kan thlak ang. Kan tan chuan point thum a pawimawh a, mipui puihna pawh kan mamawh hle. I League khel pha Lajong kan tum tur hi a phurawm khawp mai a, kei ni pawhin theithawp chhuahin kan rawn khel ang" tiin Vanglaini palai a hrilh.

BVT boss BS-a sawi ang chiah hian MPL club tan Shillong club hneh turin mipui puihna an mamawh a, Lajong player-te hi kum lama naupang an nih hlawm avangin pressure sang tak hnuaia an khelhtir a pawimawh.

Vawiin hian an match hmasa bera inhliam vanga inlan lo PC Zosanga a inlan theih tawh hmel a, chakna tur meuh chuan captain Laldingngheta a chet
ṭhat a pawimawh ang bawkin tlarhnunga H. Lalhlimpuia tawn-hriat a ṭangkai ang.