India-in Asian Cup 2027 thlen tum

All India Football Federation (AIFF) chuan AFC Asian Cup 2027 thlen a dil dawn tih nimin khan a puang a, New Delhi-a Asian Cup thlen dil tur thu puannaah hian union sports minister Kiren Rijiju, AIFF president Praful Patel, India international hlui Gouramangi Singh leh women's national team star Ashalata Devi-te an tel. 

Indian FA chuan Asian Football Confederation nena thawkdunin Indian football chu dinhmun sang zawka chawikana, ram chhung ṭhalai zinga football chawi lara, sumdawnna kawng thlenga hawn zau an tum thu an sawi. 

Asian Cup 2027 thleng tur hian Qatar, Saudi Arabia leh Iran  chuan dilna an thehluh tur thu an lo puang tawh a, India tan Asian football-a inelna ngaihhlut hlawh ber hi awlsam taka thlen theih a ni lo ang. 

Indian FA president Praful Patel chuan, "Football hmasawn nan leh khelmual leh thil dang thuam ṭhat kawngah nasa takin hma kan la a, AFC Asian Cup 2027 hi kan thleng thei a nih chuan kan tan chawimawina ropui tak a ni ang," tiin a sawi.