Copa Libertadores champion Atletico Nacional

South America khaw-mualpui football club-te inelna sang ber Copa Libertadores chu nimin khan khelh zawh a ni ta a, Colombian club Atletico Nacional chuan Independiente del Valle chu inkhel pahnih belhkhawmah 2-1 a hnehin an champion.

Copa Libertadores final hi UEFA Champions League ang lo takin home & away-a khelh a ni. Team pahnih hi an inhma-chhawn hmasa zawkah 1-1 in an inhnehtawk tawh a, nimin zing inkhelah hian Miguel Borja chuan he inkhela goal awmchhun hi khungin Atletico Nacional chu 1-0 in hnehna a chanpui a ni.

Nacional tan kum 27 hnua khawmualpui inelnaa nomawi an chawi lehna hmasa ber a ni a, kum 1989 khan Copa Libertadores nomawi hi an lo chawi tawh bawk.

A hming chu Borja

Atletico Nacional tana chak-na goal khungtu Miguel Borja hian July thlaa Copa Libertadores semifinal khelh a nih hmain Colombian club hi a zawm ve chauh a, Atletico hian an tisual lo chiang hle.

Kum 23-a upa forward hian semfinal game hnih leh final game hnih chiah khel chungin goal nga a khung a, semifinal inkhel pahnih belhkhawma Sao Paulo 4-1 a an hnehna inkhela goal zawng zawng hi a khung vek a ni.

South American Youth Championship 2013-a Colom-bia U20 lo champion pui tawhtu forward hian senior team-ah ram tan la khel lo mah se tun hnaia a khelh dan ngaihtuah chuan ngaihthah reng chi a ni hauh lo ang - Europe club liana kan hmu thuai a nih pawhin a mak lo ang.

Mumang ram chu

Atletico Nacional defender Daniel Bocanegra chuan, "Eng-kim hi mumang ram ang mai a ni a, champion nih hi kan phu a ni. Tunah chuan World Club Cup lam hawiin kan inpuahchah thei tawh ang," tiin nomawi lian zawk chawi a la inbeisei.

December 8-18 chhung khian Japan-ah World Club Cup khelh a ni dawn a, khawmualpui hrang hranga club champion-te an inel dawn. Europe aiawhin UEFA Champions League champion Real Madrid an inlan dawn a, Atlético Nacional hian CONMEBOL ai an awh ang.

AFC Champions League chu quarterfinal khelh a la nih loh avangin Asia aiawh tur hriat a la ni lo a, Africa khawmualpui club inelna CAF Champions League champion pawh hriat a la ni lo.

North America aiawh tur chu CONCACAF Champions League champion Mexican club America an ni ang a, Oceania aiawhin OFC Champions Lea-gue nomawi chawitu New Zea-land club Auckland City FC an inlan thung ang.

Club paruk inelna tur World Club Cup-ah hian khawmualpui champion bakah inelna thleng tur Japan League champion an inlan bawk dawn a ni.