Venus Williams ngam loh Coco Gauff!

Nimin khan Australian Open-ah tawnhriat nei ṭha leh tleirawl an intawng a, inkhel hmuhnawm takah Venus Williams chu Coco Gauff hneh loin a tla nghal. American player Gauff hian Nilainiah Sorana Cirstea a hmachhawn leh ang.

Season khat chhunga tennis Grand Slam hmasa berah hian champion lai Naomi Osaka leh Serena Williams te chuan harsa lo takin first round an paltlang thung a, ram kang vanga buai mek Australia-ah nimin khan ruah a sur! Ruah vang hian inkhel ṭhenkhat chu chhunzawm theih a ni rih lo.

Margaret Court Arena-a inkhelah kum 15 mi Gauff hian Grand Slam vawi nga champion tawh Venus hi darkar khat leh minute 37 chhungin 7-6 (7-5), 6-3 in a hneh a, dai ngai loh ram daiin Australian Open second round a lut.

Season hmasa khan Gauff hian qualifier paltlangin Wimbledon a khel phak, grass court inelna lianah hian a match hmasa berah Venus hi hmachhawnin a lo hneh tawh bawk - kuminah pawh thawnthu ngaihnawm a ziah chhunzawm a rinawm.

Gauff hi Venus-i ngaisangtu a ni a, an intawn dawn pawhin 'Ka Idol' tihin a sawi. Gauff chuan, "Kan inkhelh tur hi ka helhhawlhin ka huphurh em em a, kan intawng dawn tih ka hriat kha min barakhaih hle bawk. Tunah chuan harsa takin hnehna ka chang ta," a ti.

Serena Williams tan hnehna chang turin darkar khat pawh a ngai tling lo. American star hian a khingpui Anastasia Potapova chu minute 58 chhung lekin 6-0, 6-3 in a sawp. Second round-a a hmachhawn tur Tamara Zidansek tan a huphurhawm khawp ang.

Kum 38 mi Serena hian a vawi 24 nan Grand Slam champion nih a tum a, record nei ṭha ber Margaret Court-i record (24 major titles) nih rual chu a thil tum lian ber a ni rih; Melbourne khawpuia match hmasa ber a khelh dan thlir chuan Serena tan nomawi a hla lo.

Seeded pariatna Serena ai hian Petra Kvitova-i'n hnehna chang turin hun a mamawh tlem zawk! Wimbledon vawi hnih champion tawh hian minute 51 chhung lekin Czech Republic nula Katerina Siniakova chu 6-1, 6-0 in a hneh.

Australian Open champion lai Naomi Osaka pawhin harstana lian a tawk lo, Japan nula hian Marie Bouzkova chu 6-2, 6-4 in a hneh, a match lehpekah chuan Chinese nula Zheng Saisai nen an inhmachhawn leh ang.

Rod Laver Arena-a inkhelah Osaka a khel ṭha viau a, chutih rualin a tihsual vanga a khingpuiin point a hmuh (unforced errors) chu vawi 28 ngawt a ni. Round sang zawkah chuan point hmuh a har, mahni tihsual avanga khingpuite point pek hi a pawi thui thei.

Grand Slam vawi hnih champion tawh Osaka chuan, "Hnehna chang turin darkar khat leh minute 20 ka hmang, chu chuan inkhel awlsam tak a ni lem lo tih a lantir. Inelna lianah chuan tun hma lama kan la hmachhawn ngai miah loh nena inkhelh hi chu a boruak a danglam ṭhin a ni," a ti.

Inelna neih ṭan nia inkhel dangah Australian Open champion hlui Caroline Wozniacki chuan American player Kristie Ahn chu 6-1, 6-3 a hnehin bul a ṭan fuh hle. Season hmasa Wimbledon finalist Barbora Strycova pawhin Sorana Cirstea 6-2, 7-6 (7-5) in a hneh ve bawk.

Seeded 13-na Petra Martic pawhin Christina McHale 6-3, 6-0 in a hneh, Martic hian a match dawt lehah chuan 2018 Wimbledon semifinalist Julia Goerges a hmachhawn ang.