ISL khel tur East Bengal Coach thar atan Robbie Fowler

Indian Super League enkawltu Football Sports Development Limited (FSDL) chuan Kolkata club lian East Bengal-in season tharah ISL an khelh tur thu an puang chiang ta a, ISL 2020-21 season-ah Kolkata derby kan hmu thei dawn tihna a ni. 

East Bengal hian sum lama harsatna nei lo Shree Cement Limited an thawhpui hnuah sum an ngah thar a, September thlatir khan West Bengal chief minister Mamata Banerjee chuan East Bengal-in ISL an khelh tur thu hi a lo puang tawh - tunah official a puan a ni ta. 

Kolkata club hlun Mohun Bagan chuan season lo awm tur aṭangin ISL an khel dawn bawk a, anni erawh ISL club awmsa ATK nena inzawmin an club hmingah hian ATK Mohun Bagan tih an hmang. 

East Bengal-in ISL an khel dawn tih a chian hnu lawkah coach atan Liverpool legend Robbie Fowler an lakluh tur thu a thang nghal a, he thuziak i chhiar meuh chuan official-in an puang fel tawh hial mai thei. 

English striker ropui hian khelmual lama a sulhnu ngaihtuahin coaching lamah erawh tawnhriat a la nei tam lo hle. Kum 2011 khan Muangthong United tana a khelh laiin season laihawlah player-manager hna chelhtir a ni a, Thai Premier League club hi pathumna niin season a kharpui. 

Kum 45 mi Fowler hian April 2019 - June 2020 inkar khan A League club Brisbane Roar FC-a lo enkawl tawh a, league round-ah palina nihpuiin January leh February khan Coach of the Month-ah thlan a ni hial.