I Day Football 2016 AIFF U19 hmaa mualpho thei Aizawl FC
I Day Football champion lai Aizawl FC-in nomawi humhim tuma an bul ṭan nan Chanmari FC an hneh lo a, vawiin chhun dar 2:45-ah India ram hmun hrang hrang aṭanga rawlthar ṭha rual awmkhawmna AIFF Under 19 an hmachhawn leh dawn.
Kawng zawh tur?
Group khatah team panga an awm a, semifinal-ah pahnih tan chiah hmun a awm. Aizawl FC hi match hnih a zawna an chak lo a nih ngat chuan an nomawi kawl zawn tumna kawng a zim tawh khawp ang.
Group A-a inkhel pakhat zawk hi naktuk tlai dar 2:45-ah Chanmari FC leh Chhinga Veng FC ten an khel dawn a, round hnihnaa inlan lo Chanmari West an vannei letling. A tawi zawng chuan vawiin hian eng result pawh awm se Group of Death ngaihnawmna a kiam dawn lo.
Ṭhat dan ber
Aizawl FC-in 4-5-1 an hlawh-tlinpui lo a, match hnihnaah chuan goal khung ngei tumin an khelh dan an thlak ang.
Inkhelh ṭan phat aṭangin Ghanaian striker Bright Medsion Mends a inlan nghal dawn a, tlarhnung thlengin thlak danglam a ni dawn.
Goalkeeper tur chu MPL season li chhunga best keeper la ni vek thei Lalawmpuia a ni ang a, vei lamah Ricky Lal-lawmawma awmin defence laiah Lalramchullova leh Lal-ruatthara te an inkawp ang. Dinglamah Lalrinzuala a la awm chhunzawm dawn.
Defence pui turin H. Lal-biak-thanga a awm ang a, cap-tain Rohmingthanga aiah B. Zoramthara a inlan dawn a, field sir aṭanga an nawrna tur chu Albert Zohmingmawia leh Brandon VL Remdika te an ni.
Tlarhmaa Ghanaian striker kawppui tur chu rawlthar Lalremsanga a ni a, hei vang hian Albert leh Brandon te goal nawr kawngah an pawimawh zual ang.
I League a nih tawh loh avangin Aizawl FC squad pawh a pan tawh a, hei hi AFC player-te pawhin an hriat a ṭul. Rawlthar hmaa an mualpho loh nan chuan khelmual chhungah thiamna ni ringawt loin tumruhna an ken luh tel a ṭul tawh.
An ṭha seng sawng!
AIFF Under 19 te hi rawl-thar ṭha rual an ni a, an kum naupanna chu an ṭhat lohna lai a nih rualin coach mit tlun tum vek an nih vangin an chhiatna hi inlungrualna taka an khelh theihna pakhat a ni lawi si.
Coach Floyd Pinto hnuaiah khelh dan phung nghet tak an nei a, hei ringawt pawh hi en tlak a ni.
Aizawl FC midfield laia awm tur an lian lo a, AIFF Under 19 lam an sang ṭha thung. SAIL Football Academy, Bokaro aṭanga an lak Abhishek Haldar hi a
ṭhianten 'Paul Pogba' tiin an ko fiam a, vice captain Abhishek hian French midfielder ang thoin jersey 15 a ha dawn. Bengali midfielder hi Lunglei rawlthar Lalengzama Vangchhia leh Sikkimese midfielder Namgyal Bhutia ten an thlawp dawn a, training-na an pha ta lo deuh a nih pawhin an hmuhnawm tho ang.
India captain armband hreng pha Jeje Lalpekhlua'n Aizawlah India ram pum huap competitive match a la khel lo a, talent nei
ṭha Lalrindika Ralte lah inhliam vangin I League khelin RG Stadium-ah a la inlan lo. Aizawl FC zarah state pawna inkhelh thiam Mizo player-te hmu nual mah ila kan hmu kim vek thei lo.
Tun ṭuma rawn kal AIFF Under 19 captain 'Edu' tia an koh Edmund Lalrindika hi inhliam damkawr a nih avangin inkhel bul a ṭan lo mai thei a, amaherawhchu training-na aṭanga thlir chuan hun rei lote tal chu a hmel kan hmuh a rinawm. Lunglei rawlthar talent nei ṭha zet hi nakina a khel lai en loh vanga inchhir leh ai chuan tuna en mai hi a fuh ang.
Mizo dang
AIFF Under 19-ah Mizo pasa-rih an awm a, chung zing-ah chuan Lunglei defender Lalliansanga chu training-naa a inhliam avangin AFC a la hmachhawn thei lo ang.
Midang paruk Edmund, Zama, Zonunmawia, B. Lalnuntluanga, B. Rohming-thanga leh Joseph Lalsanglura te hi Lammual pan phahna chhan tham an ni.
AIFF U19 coach Floyd Pinto hi Aizawlah B Licence Course chhimin a rawn kal tawh a, tunah chuan AFC A Licence a nei tawh. Amah hi inkhelh thiam ni lo mah se lehkhathiam a nih avangin a football thlir dan a dang.
Training-naah chuan ball awm lohna laia player awm dan tur thlengin an zir uluk a, hei hi a taka an hmang thei a nih chuan an enktlak khawp ang.
Chutihrualin AIFF U19 hmaa ding tur hi I Day Football leh MPL champion lai an ni a, rawlthar rual hi chak tura rinkai lo zawk an nih avangin pressure nei loin an khelh theih phah ang.