Augsburg lakah Dortmund an tlawm

Borussia Dortmund-in thawm nei lian viau mah se Bundesliga match hnihna lekah Augsburg 2-0 a hneh loin an tlawm. Inrinni zan inkhelah hian Augsburg tan Felix Uduokhai leh Daniel Caligiuri ten goal an khung. 

Minute 40-naah Uduokhai-a'n Caligiuri freekick pet a tauh lut a, Caligiuri hian minute 54-naah ama pualin a khung ve bawk. Florian Niederlechner through ball pek chu Caligiuri hian um lutin Thomas Meunier-a'n veng mah se goal khung a ṭhulh phah lo.

Bundesliga-ah entu awm an phal ṭan a, WWK Arena-ah entu 6,000 an awm. Augsburg hian 20% chauh ball possession an nei a, amaherawhchu Dortmund hian an ball chan tamna goal-ah an chantir thei lo.

Hun tawp dawn hnaiah Jadon Sancho pass chu Erling Braut Haaland-a'n goal-ah pet mah se keeper Rafal Gikiewicz-a'n a dansak. Dortmund tan hian Jude Bellingham pawhin bul a ṭan a, amaherawhchu kum 17 mi English midfielder hi minute 60-naah an thlak.

Bundesliga inkhel dangah Champions League chuh pha tura ngaih Bayer Leverkusen leh RB Leipzig te 1-1 in an inhnehtawk. Leipzig tan Emil Forsberg-a'n minute 14-naah a khung a, Leverkusen-in minute 20-naa Karem Demirbay-a goal hmangin an sut. Nizan khan champion rinkai leh champion lai Bayern Munich leh Hoffenheim te an inkhel a, result kan hre hman lo.