Premier League hmahruaitu Everton

Everton-in Inrinni zan khan Dominic-Calvert Lewin leh Richarlison goal hmangin Crystal Palace 2-1 in an hneh a, Carlo Ancelotti hote hi Premier League hmahruaitu an ni.

Selhurst Park-ah Calvert-Lewin-a'n minute 10-na lekah a khung a, tun season-ah goal nga a khungna chiah. Palace-in minute 26-naah Cheikhou Kouyate tauh lut hmangin sut mah se Richarlison-a'n minute 40-naah penalty aṭangin chakna goal a khung.

Toffees wing back Lucas Digne-a ball tauhin Joel Ward-a kut a per a, amhaerawhchu a chian tawk loh avangin referee-in a ham lo. Inkhelh chhunzawm a ni a, Palace-in an nawr let leh hman mah se ball a thih chiahin VAR hmangin en let a ni a, Everton-in penalty an hmu.

Crystal Palace manager Roy Hodgson chuan, "Kan game ṭha tak chu thutlukna pakhatin a ti chhe ta vek a ni. Dan hi ka pawm zawng a ni lo. Football-a inhmangte chuan dan hi hriatthiam har kan ti a, referee pawh khan penalty awmah ngai lo mah se pe tura tih a nih avangin a pe chauh a ni," tiin penalty an chawi dan chu a pawm loh thu a sawi.

Eagles boss Hodgson chuan sawi chhunzawmin, "Nakinah chuan player-te'n penalty hlawhchhuah nan kut pet per hi an la tum ang a, handball tihin an au zui ang," tiin dan ṭhat lohna lai a sawi lang.

Everton manager Carlo Ancelotti chuan, "First half-ah kan khel ṭha a, second half-ah erawh Palace-in pressure min pek nasat avangin a harsa. Chutihrualin result ṭha tak kan nei thei a, a lawmawm hle. Nilainiah inkhelh tur a awm lehnghal a, hahdam hman kan ni lo," tiin a sawi.

Toffees hian Nilaini zan dar 12:15-ah League Cup round of 16-ah West Ham an mikhual ang. Premier League-ah Brighton & Hove Albion chu an hmachhawn leh hmasak ber tur a ni a, Inrinni zan dar 7:30-ah Goodison Park-ah an inkhel ang.