Domestic Cricket atan Mizoramin squad an puang

Cricket Association of Mizoram (CAM) chuan India rama cricket inelna sang pathum Sayed Mustaq Ali, Vijay Hazare leh Ranji Trophy khel tur squad an puang. Over 20 hmanga inelna Sayed Mustaq Ali hi January 10 hian khelh ṭan tur a ni a, Mizoram pawhin nimin khan Durtlang-ah training an ṭan.

Over 20 hmanga inelna Sayed Mustaq Ali hian ngaih pawimawh a hlawh a, a chhan chu a kalhmang hi Indian Premier League (IPL) nen a inzawm vang a ni. Inelna hi IPL team ten player zawn nan an hmang ṭhin a, a pawimawh hle.

Hemi piah lamah hian over 20 chauh hmanga inelna a nih avangin inelna buatsaih a awlsam. Covid-19 vanga buaina karah inelna dang buatsaih theih a ni dawn em tih enchhinna ṭha tak a ni ang.

BCCI chuan January 1, 2021 hi team-te inelna hmun thlen hun atan a ruat. Inelna hi January 10-ah ṭan a ni ang a, final hi January 31-ah khelh a ni dawn. Inelna khelh tluan dan a zirin BCCI-in inelna dang Vijay Hazare leh Ranji Trophy te khelh dan turah ruahmanna an siam thei ang.

UAE-ah kumin IPL khelh a ni a, a hlawhtling. BCCI-in tualchhung inelna pawh hi fimkhur takin a kalpui dawn a, inelna hmachhawn turte hi 'Bio-Bubble' chhungah vek a dah dawn.

Bio-Bubble han tih hian thil dang teh vak chu a awm lo. Team thlenna hotel-ah khualzin dang an thleng ve thei lo a, player-te hi an chhungte leh ṭhianten an tlawh thei lo bawk. 

Inelnaa inhnamhnawihte hi a khat tawkin Covid-19 test an nei dawn a, an hman tur bik 'bus'-in team-te hi an training-na hmun leh inkhelhna hmun turah a hruai ṭhin ang. 

Inelna thleng tur pawh hian khelmual neih ṭhat a tawk lo a, hotel neih ṭhat a ngai tel bawk. Sayed Mustaq Ali thleng tur hian Chennai, Bengaluru, Visakhapatnam/Hyderabad, Baroda, Chandigarh leh Kolkata te chu buk mek an ni.

Cricket-ah sum a tam an ti a, BCCI hnuaia Cricket Association of Mizoramin affiliation an hmuh aṭang kha chuan thudik a ni. Amaherawhchu a hlawkna tel pha turte chu Mizoram aiawh telte an ni a, inelna an hmachhawn a zirin hlawh zat tur 

a awm vek.

Sayed Mustaq Ali Trophy-ah match khatah a khel pha tan Rs 17,500 hlawh tur a awm bakah DA atan Rs 1,000 dawn tur a awm bawk. Nikum khan Mizoram khan match sarih an khel a, chak an nei lo chungin match khel kim vek chuan Rs 1,29,500 (DA telin) an dawng pha dawn tihna a ni. Bench-a awm player hian match fee hi a chanvein an dawng thung.

Vijay Hazare Trophy hi over 50 hmanga inelna a ni a, match khatah a khelpha chinin Rs 35,000 an dawng a, bench-a awm player-in a chanve Rs 17,250 an dawng. Nikum khan Mizoramin match kua an khel a, khel kim vek player chuan Rs 3,24,000 (DA telin) an hum hawn thei ang.

Ranji Trophy hi tualchhung inelnaa ngaihhlut ber a ni a, ni li chhung khelh a ni. Match khatah player pakhatin Rs 1,40,000 a hlawh a, DA atan Rs 1,000 a tel. Bench-a awm player hian a chanve Rs 70,000 an dawng pha bawk. Inelna hi nikum kum tawp leh kumtira khelh a nih khan Mizoramin match kua an khel a, a khel kim vek chuan Rs 12,69,000 (DA telin) an dawng pha.

India ram state dangten cricket an khel hma a, Mizoram chauh ni loin NorthEast state-te nen kar la zau hle. Inelna ṭha a awm theih nan BCCI chuan professional player pathum lak a phal. Mizoram chuan season liam taa a laksa player pathum Taruwar Kohli, Punjab, KB Pawan, Bangaluru leh  Pratik Pratab Desai, Mumbai te a la nawn leh ang.

CAM secretary Mamon Majumdar chuan, "Professional player hi a lak loh theih tho a, mimal duh danah chuan tualchhung player hlanga khelh hi ka duh. Mizoram dinhmun a zirin season tharah chuan professional lak tawh loh ka duh. 

"State pawn player an awm hian kan player-ten an theihna tak tak an lantir thei loah ka ngai a, chutihrualin professional player tel loa khel tur chuan tun aiin player-te an thawhrim a ṭul dawn a ni," tiin Vanglaini a hrilh.