Anfield-ah fiahna hmachhawn turin Arsenal

Arsenal-in Community Shield nomawi chawi chungin season bul an ṭan a, league-ah a zawna Fulham leh West Ham hnehin League Cup aṭangin team ṭha Leicester City an pet chhuak bawk. 

Mikel Arteta enkawlna hnuaiah Arsenal an insiamṭha ta niin mi tam takin an ngai a, Spanish manager enkawlna hnuaia Arsenal khelh danin fak a hlawh hle.

Mahse, zanin dar 12:30-ah Arsenal hian Anfield-ah Liverpool an lenchilh dawn a, Gunners tan he inkhel tur hi tun season a fiahna an hmachhawn hmasak ber tur tiin a sawi theih. Liverpool hian tun season-ah match thum chhungin goal 13 zet an thun tawh tih hriat tel a ṭha a, Gunners tan goal khung bakah a venhim lam ngaihtuah tel a ngai dawn tih a chiang. 

Season hmasaah Liverpool hian point 18 ngawta sang fal chungin league nomawi an chawi a, tun season-ah Konstantinos Tsimikas, Thiago Alcantara leh Diogo Jota an neih belh avangin he team ṭha tawh sa hi an ṭhat belh. 

Reds hian an match hmasa berah Leeds United chu 4-3 in an hneh a, a hnuah Chelsea chu 2-0 in an hneh zui zat bawk. League Cup lamah club tenau Lincoln City chu an 'B' team hmangin 7-2 ngawtin an sawp bawk. Liverpool result aṭanga lang chiang chu goal khung an harsat lo tih hi a ni a, chutihrual chuan tun hnaiah an thiampuipa Virgil van Dijk-a'n chetsual zauh a chin avangin goal an chhuah leh ṭhin. 

Arsenal hian Alexandre Lacazette, Pierre-Emerick Aubameyang leh Willian hmanga an nawr dawn avangin Leeds laka goal thum chhuahtu Liverpool hian invenhim lam an ngaih pawimawh tel a ngai ang. 

April 2017 chu a rei leh ta - hemi hnuah hian Anfield a Premier League match an khelhah Liverpool an la tlawm miah lo a, match 60 chhung chu Anfield-ah hian league a tlawm an la nei lo tihna a ni!

Anfield a Liverpool record enin Arsenal tan hna a awlsam dawn lo tih a chiang a, season hmasaa an lenluh ṭum khan 3-1 in an tlawm bawk. Hriat tel tur erawh Gunners hian Community Shield-ah penalty hmangin Liverpool hi an hneh tawh a, an zuam sawt ang. 

Liverpool hian hliam vangin captain Jordan Henderson an chhawr thei dawn lo a, niminah khan midfielder Thiago leh goalkeeper Alisson chuan hliam tenau vangin training an zawm lo bawk - vawiinah Klopp-a'n player pahnih inlan theih dawn leh dawn loh a tichiang ang. 

Joel Matip leh Alex Oxlade-Chamberlain chu hliam vanga inlan lo tur chiang an ni a, Joe Gomez dinhmun a la chian loh avangin VVD-a'n Chelsea laka centre back a khel ṭha tak Fabinho a kawppui a nih pawhin a mak lo ang. 

Arsenal tan Laipui puah ṭhat duh vanglai a ni a, Gunners hian Premier League ṭan a nih hnua inelna hrang hranga match thum an khelhah goal sarih khung tawhin an lamah goal khat chiah a la lut. 

Gunners player langsar zingah Kieran Tierney dinhmun a chiang lo a, rawlthar duhawm Gabriel Martinelli inhliam chu a dam hun tur sawi theih a la ni lo bawk - player pahnih hi an 'regular' loh avangin Arsenal tan erawh buai philina tur a ni lo.

Arsenal hian season hmasa lama an talbuaina tlarhnung lai chu Brazilian defender Gabriel an neih hnuah an chingfel niin a lang a, tun season a David Luiz khelh dan enin 'harhtharna' a chang tih loh rual a ni lo bawk. 

Chelsea aṭanga Gunners pantu Willian hi Arsenal-ah pawh a tlangnel leh viau tawh a, chhuak tur anga sawi thawm awm hman Lacazette-a 'class' kan hmu chho a, contract ziak thar hlim Aubameyang lah a phur vanglai tak a ni - inkhel hmuhnawm a beisei ngam e!

Arsenal-in season hmasa chawhnu lamah Liverpool mikhualin Emirates Stadium-ah 2-1 in an hneh a, Community Shield-ah an hneh nawn sak - Reds manager Jurgen Klopp tan chuan pai dam harsa tak a ni. 

Klopp chuan, "Hnehna chan kan duh ve tawh. Kan intawn hnuhnung pahnihah kan tlawm ngei a, mahse min sawp lo - chance nei ve ve kan ni. Zanin kan inkhel tur chu game dang hlak a ni a, chu chu Arsenal pawhin an hria a ni," a ti a, point thum hlawhchhuah ngei a tum. 

German coach chuan Arteta fak zuiin, "Arsenal a enkawl hnuah hna ṭha tak a thawk a ni. Gunners a pan tirh khan a champion theih ring chu an tlem ngawt ang. Mahse, FA Cup leh Community Shield hmangin a chhanglet a, pui tak a ni. Hei hian kan team hmachhawn tur ṭhatzia a hrilhfiah," a ti.

Arteta erawh a ṭawng fimkhur hle. Gunners boss chuan, "Liverpool 'level'-ah kan la awm lo. Premier League leh Champions League a an hnathawh kan hmu a, team ṭha bik an ni. Anni chauh ni loin Manchester City pawh an ni a, anni el phak turin theihtawp kan chhuah a ni," a ti a, "Theihtawp chhuah hi hnehna kan chan theihna tur chu a ni," tiin a sawi zui.