Liverpool-in Bournemouth mikhual dawn

Arne Slot-a hnuaia an league match hmasa pathumah an chak avangin champion tur zingah Liverpool sawi rik an ni a, mahse, an league match hnuhnung berah rin loh takin Nottingham Forest chu 1-0 in an ngam lo.

Dutch coach-in dem rawn a hlawh zui a, Premier League hautakzia a tem ṭanah tam takin an ngai. Champions League an khel zui a, AC Milan lakah goal chhuah hmasa zuk mah se, an insiamrem leh vat a, 3-1 in an chak.

Slot-a'n, "Hetianga khel theite chu engtin nge Forest lakah, mahni mualah lehnghal kan tlawm theih?" tiin zawhna a nei zui a, kar hmasa an tlawmna kha a la la na reng tih a lang - zanin dar 7:30-ah Bournemouth an mikhual zui dawn a, Slot-a'n chak loh a duh lo ang.

A tawk lo

Slot-a hnuaiah Reds-in match nga an khel tawh a, vawi li chakin vawi khat an tlawm tawh tihna a ni - an hneh zingah Manchester United (3-0) leh AC Milan (3-1) an tel a, khualmualah ve ve a nih bawk avangin dah hniam theih an ni lo.

Hetihrual hian coach Slot erawh a lawm a la kim lo. Feyenoord boss hlui chuan, "Fans puihna kan sawi ṭhin a, fan-ten phur taka min auh theihna tur chuan keini pawhin hna kan thawh ve a ngai a, tun dinhmunah chuan kan thawk ṭha tawk lo.

"A pawimawh ber chu keimahni kan khelh ṭhat hmasak a ni a, chutianga kan khelh theih phawt chuan fan-te pawh an phur ve mai ang," a ti a, Anfield-ah fan-te puihna hmu turin khelh ṭhat hmasak an mamawh thu a sawi.

Alisson hi

Liverpool-in Cherries an mikhual hmain chanchin lawmawm lo an nei a, goalkeeper ṭha mi Alisson chu a tihrawl hliam vangin a inlan theih dawn leh dawn loh a chiang lo - Caoimhin Kelleher a la awm tho avangin thlaphan lutukna tur erawh a ni lo.

Slot-a'n league match li an khelh tawhah a starting XI a thlak danglam meuh lo a, Forest laka an tlawm dan thlirin, a bik takin tlarhma a siksawi a rinawm. Mohamed Salah hi khawih chet thiang loa ngaih a ni a, Cody Gakpo leh Darwin Nunez ten Diogo Jota leh Luis Diaz aia luh an châk ve tawh dawn.

Milan lakah player thar Fedrico Chiesa chu bench aṭangin a lut a, zaninah bul a ṭan la rinawm lo mah se, bench aṭang tal chuan a luh a rinawm tawh. Milan laka bench lama awm tluan Andrew Robertson pawh bul ṭan tura a lo kir a rinawm.