Chhetri a la tar lo

Kum 40 ni tawh mah se Sunil Chhetri-a'n a la tar lo tih khelmualah a pholang a, Ningani zan khan Indian Super League-ah Bengaluru FC tan goal hnih a khung - a team hi Hyderabad FC lakah 3-0 in hnehna a chanpui a, Bengaluru hian match hnih aṭangin point ruk an nei ta.

Bengaluru hian minute ngana lekah Rahul Bheke hmangin goal hmahruai an khung a, goal dang an khung thei lawk lo. Minute 57-naah bench aṭangin Chhetri a lut a, minute 85-na leh hun pek belhah a khung a, 3-0 in a team a chakpui.

Chhetri hian ISL-ah goal 63 a khungna chiah a ni a, ISL-a goal khung hnem ber ni lai Bartholomew Ogbeche goal khung zat a nih rual chiah - Nigeria tana World Cup 2022-a inlan tawh Ogbeche hian match 98 chiah a mamawh thung a, Chhetri erawh match 156 a mamawh thung.

Paris Saint-Germain striker hlui Ogbeche a chawl tawh a, Chhetri hian a khum thuai a rinawm. ISL chanchina goal khung hnem lamah Lallianzuala Chhangte chu palina a ni mek a, Mumbai City captain hian match 144-ah goal 40 a khung tawh.

Ningani zan ISL inkhelah hian Bengaluru tan midfielder Lalremtluanga Fanai chu bench aṭangin a lut a, Hyderabad tan Ramhlunchhunga'n bul ṭanin, bench aṭangin Aron Vanlalrinchhana a lut bawk.