Chanmari FC-in Kolkata an pan dawn

21st September, 2024

MPL club Chanmari FC chuan I League 3 final round khel turin September 22, Pathianni hian Kolkata an pan dawn a, inelna hi Kalyani Stadium, Kolkata-ah September 25, Nilaini aṭangin khelh ṭan a ni ang.

Lalsangzuala Hmar hote hian final round lut turin an group-a awm GMSC, HAL Sports Club leh Coramandal FC leh RKM Football Academy te an hneh vek. Final round lut team 10 chu group pahnihah panga ve vea ṭhen darh an ni a, group khat aṭangin a sang pahnih chu I League 2 khel turin an tling ang.

Mizo club Chanmari hi group B-ah Abbas Union FC (Hyderabad), Dalbir FA (Punjab), MYJ-GMSC (Mumbai) leh SAT Tirur (Kerala) te nen an awm ho.

Group A-ah Diamond Harbour FC (West Bengal), Sesa FA (Goa), KLASA FC (Manipur), Karbi Anglong Morning Star FC (Assam) leh Downtown Heroes FC (Jammu and Kashmir) te an awm a, anni hi Naihati Stadium, Kolkata-ah an khel thung ang.