Champion lai Nadal inlan dawn

Tennis season kal laia Grand Slam hnuhnung ber tur French Open 2020 chu nimin tlai aṭang khan khelh ṭan a ni a, tennis ngainatute chuan chawlhkar hnih chhung chu Paris khawpui lam an hawi dawn tihna a ni.

Nitin singles match hmasa ber hi chawhnu dar 2:30-ah khelh ṭan a ni ṭhin dawn, ni hmasa bera inlan zingah Andy Murray leh Stan Wawrinka inkhel chu ngaihven hlawh ber a ni a, Grand Slam champion tawh pahnih hi nizan khan Philippe-Chatrier-ah inkhelin he thu buatsaih lai hian result kan hre hman lo.

French Open hi a tira ruahman dan chuan May thlaa khelh tur kha a ni a, coronavirus vangin an sawn tlai. Inelna buatsaihtu lamin stadium pakhatah seat 60% zel entu awm thei turin ruahmanna an siam a, mahse tih tlem leh a ni. Ni khatah mi 1000 vel bawr zelin a hmunah inkhel an en thei ang.

Clay court inelna lianah hian Rafael Nadal chuan a vawi 13 nan champion a tum dawn a, nomawi a chawi a nih chuan Roger Federer nihrualin mipa singles-ah major title la hnem ber a ni ang. Spanish star hian a match hmasa berah Egor Gerasimov a hmachhawn dawn a ni.

Grand Slam vawi 19 champion tawh Nadal hian hri leng hlauh veng leh, clay court lama insawrbing duh vangin US Open a khan a khel lo, kar hmasa khan Rome Open-ah inlanin beisei a phak lo - French Open hi atan fiahna a ni dawn.