A zawna vawi thum chak tum Chelsea

Chelsea-in season Premier League-ah bul ṭan ṭha tawk lo mah se khualmualah erawh an che ṭha. Blues hian khualmuala match hnih an khelh tawhah hnehna an la chang ve ve a, vawiin tlai dar 5:00 hian West Ham United an lenchilh dawn.

Enzo Maresca hote hian Hammers hi an hneh thei a nih chuan a zawnin khualmualah match thum an chak ang. Kar liam ta khan Blues-in Bournemouth 1-0 in an hneh a, hemi ṭuma hliam vanga inlan lo Malo Gusto, Romeo Lavia, Enzo Fernandez leh Kiernan Dewsbury-Hall ten training an zawm tawh.

Chutihrualin Hammers an hmachhawn hunah chuan Cherries laka che ṭha Jadon Sancho-a'n en bik a hlawh ang. English winger Sancho chuan, "Chelsea tana ṭha taka ka khel thei kha ka lawm a, khami tur khan ka thawkrim bawk. Coaching staff leh ka khelhpuiten min lawm thiam a, team chhungah ka tlangnel," tiin a sawi.

Chakna goal khungtu Christopher Nkunku chuan, "Club lian kan ni a, player ṭha pawh kan kawl. Position tinah inel tur player an awm vek a, training leh match apianga thawhrim hi kan tih tur chu a ni," tiin a sawi ve bawk.

Chelsea khingpui tur West Ham hian match liah point li chauh an la hlawh chhuak a, Blues ang thoin an mualah an che ṭha bik lo. Hammers hian Aston Villa leh Manchester City te tun season-ah an mikhual tawh a, an la chak lo ve ve.