Hojlund leh Mount ten training an zawm

Manchester United chuan zanin dar 10:00 hian Crystal Palace hmachhawn turin Selhurst Park an tlawh dawn. Rasmus Hojlund leh Mason Mount ten training an zawm tawh avangin Eagles an hmachhawn hunah squad-a awm thei dinhmunah an ding.

Kum 21 mi Hojlund hian nikum nipui khan Man United hi a zawm a, season liam ta khan Premier League-ah match 30 khelin goal 10 a khung. Danish striker hi pre season-a Arsenal nen an inhmachhawn ṭumin a inhliam a, tun season-ah competitive match a la khel lo.

Mount erawh Fulham leh Brighton & Hove Albion te an hmachhawn ṭumin bul a ṭan a, Seagulls an hmachhawn ṭum hian hliam vangin half time-ah lakchhuah a ni.

United manger Erik Ten Hag chuan, "Team zinga training an rawn zawm leh thei hi chanchin lawmawm a ni. Bul ṭan thei turin an fitness a ṭha em, tih chu kan endik phawt ang," tiin a sawi.

Ten Hag-a hote hian season bul an ṭan ṭha tawk lo a, league match hmasa berah Fulham hneh mah se Brighton leh Liverpool lakah an tlawm. International break zawhah Man United-in harhtharna an chang a, Southampton 3-0 a an hneh bakah kar laihawl khan League Cup-ah League One club Barnsley chu 7-0 in an sawp.

An inkhelh hnuhnung pahnihah hian Marcus Rashford leh Alejandro Garnacho ten goal an khung ve ve a, Palace lakah Rashford leh Garnacho te hi tlarhma lamah an pawimawh ang. Chutihrualin Andre Onana leh United tlarhnung pawhin hma an sawn a, match hnuhnung pahnihah an clean sheet ve ve.

Chutihrualin kumin May 6 khan Man United hi Selhurst Park-ah an mualpho a, Palace hi 4-0 ngawtin an ngam lo. Eagles tan hian Michael Olise-a'n goal hnih a khung bakah Jean-Philippe Mateta leh Tyrick Mitchell ten goal khat ve ve an khung.

French midfielder Olise hian Bayern Munich a zawm a, Palace-in Eberechi Eze la nei mah se Palace-in Olise awm lo an tuar - tun season Premier League-ah chak hmel an la hmu lo. Hei vang hian season liam ta ṭum hnih ngawt an hneh theih Man United hi hneh leh ngei an tum ang.