Leverkusen tan hun chhinchhiahtlak

Bundesliga champion Bayer Leverkusen-in Xabi Alonso hoa Champions League match an khelhna hmasa berah Feyenoord 4-0 in an sawp. De Kuip, Rotterdam-ah Leverkusen tan Florian Wirtz-a'n goal hnih khungin Alejandro Grimaldo-a'n goal khat a khung belh bakah Feyenoord keeper Timon Wellenreuther-a'n anmahni lamah a tilut bawk.

Leverkusen-in khualmualah bul an ṭan ṭha a, Wirtz-a'n minute ngana lekah box pawn aṭangin a khung. Feyenoord hian minute kuanaah siphurh sutah inngai mah se VAR hmanga ennawn hnuah offside vangin pawm a ni lo.

Dutch club-in siphurh sut tumin an nawr na a, mahse an tlarhnung phui lo an tuar. Grimaldo-a'n minute 30-naah goal hnihna a khung a, Victor Boniface leh Jeremie Frimpong te thawhrah a ni.

Feyenoord-in siphurh sut ṭhenna remchang an nei a, an hman ṭangkai loh an tuar a, an tlarhnung a pawp bawk. Minute 36-naah Frimpong-a cross chu Wirtz-a'n ball kan laiin a volley lut - goal mawi a tling pha. First half tawp hma chiahin Grimaldo freekick chu defender Edmond Tapsoba-a'n goal lamah tauhin goalkeeper Wellenreuther-a'n an lamah a tilut.

First half-ah 4-0 a ni tawh a, second half-ah erawh a luh belh lo. Feyenoord-in na zawkin an nawr a, Moussa Hadji cross chu substitute Ayase Ueda-a'n goal-ah chantir mah se offside vangin pawm a ni lo. Dutch club an khel chhe lo a, an chak lohna zat erawh 4-0 lawih a ni.

Bayer Leverkusen tan erawh hun duhawm a ni a, striker Victor Boniface pawh a lawm hle. Nigerian striker Boniface chuan, "Champions League en tura 30 naira (Rs 1.53) chawi ṭhin khan Champions League match kan khel a, ka tan chuan hun hlu bik a ni," tiin a sawi a, tunah chuan TV aṭanga thlir ringawt loin Europe football inelna sangah a khel tawh.

Alonso hote hian September 22, Pathianni zan dar 7:00-ah Wolfsburg an mikhual dawn. Leverkusen hian season liam ta khan hneh loh nei loin Bundesliga nomawi chawi mah se kuminah erawh vawi khat chak loh an nei tawh a, nomawi humhim turin chetsual a thiang lo ang.