Monaco ngam loin Barcelona an tlawm!

Barcelona-in league match nga an khelh tawhah hnehna an chang vek a, game hmuhnawm an pholan ṭhin bawk avangin Hansi Flick-a hoin Catalan club ropui hi an indinthar leh mekah tam takin an ngai.

Mahse, Champions League khelh hun a thlen meuh chuan Barcelona an tlawm nghal - Catalan club hian khualmualah AS Monaco an lenchilh a, French club hi an hneh ngei tura ngaih ni mah se, 2-1 in an tlawm a, point hlawh chhuak loin France an hawsan.

Monaco tan Maghnes Akliouche chuan minute 16-na lekah goal hmahruai khungin, Barca hian Lamine Yamal hmangin an chhanglet vat. Mahse, second half-a George Ilenikhena goal khung erawh a chhanletna tur an nei lo a, 2-1 in an tlawm.

La Liga hmahruaitu Barcelona tan result lawmawm lo a ni a, Pathianni zan dar 10:00-ah Villarreal lenchilhin league match an khelh chhunzawm ang - zanin dar 12:30-ah Real Madrid-in Espanyol an mikhual ang a, Pathianni zan dar 12:30-ah Rayo Vallecano chuan Atletico Madrid an mikhual dawn thung.

An chesual

Barca-in league match nga zet a zawna hnehna an chan tawh avangin an inringtawk a, mahse, French club Monaco laka chesual turin hun an mamawh rei lo hle - minute 10-na lekah Marc-Andre ter Stegen a chesual nghal a, kim loin Catalan club an khelh zui a ngaih phah.

German keeper hian hnai têa awm Eric Garcia chu ball pek a tum a, hei hi Takumi Minamino chuan a lo lak khalh. Garcia-a'n ven dan ṭha bera a hriat hmangin Japanese forward hi a titlu a, hnawhchhuah zui a ni.

Kim loin Barca an khel a, Monaco-in an ngam sawt. Minute 16-naah Akliouche a inlar zui a, kum 22 mi attacking midfielder hian ṭha zeta ball a lakluh hnuah, Barca tlarhnung ven kar aṭangin a pet a, Ter Stegen a che lo - a goal chiang hle.

Barca hian hnufual reng erawh an tum bik lo. Minute 28-naah rawlthar duhawm Yamal a inlar a, kum 17 mi forward hian si phurh sutna goal a khung - Barca-in beiseina thar an nei.

Mahse maw...

Kum 17 mi lek ni chunga European champion ni thei Yamal-a lansarh zanah a aia langsar a awm a, a hming chu Ilenikhena a ni. Minute 59-naah Ilenikhena hian Breel Embolo a thlak a, goal khung turin hun a mamawh rei lo.

Minute 12 lek khelmualah hun a hmang hman chauh tihin Monaco tan goal a khung nghal a, Champions League-a Monaco tana goal khung thei naupang ber record a siam - kum 18 leh ni 34 mi a ni a, Kylian Mbappe record lo siam tawh chu a khum.

Mbappe hian kum 18 leh ni 63 mi a nih lai khan Monaco tan Champions League-ah goal a lo khung tawh a, Real Madrid striker ni ta record siam hi Ilenikhena hian a khum ta a ni. Nigerian striker hian Royal Antwerp aṭangin Monaco hi nipui lai khan a pan a, French club tana a goal hmasa ber chu Barca lakah a khung - a hre reng tawh ang.

Hetihlai hian Yamal pawhin sulhnu ropui a hnutchhiah ve tho - Champions League match 11 a khelhna niin, kum 17 hnuai lam zingah heti zat Champions League-a match khel thei an la awm ngai lo a, kum 17 leh ni 68 mi niin, Barca tana a khelhpui Ansu Fati (kum 17 leh ni 40) dawta Champions League-a goal khung thei naupang ber a ni.